Ditë zie kombëtare/ Të majtë e të djathtë homazhe në nder të ish-Presidentit Nishani

Me vendim të qeverisë dita e sotme është shpallur ditë zie, në nder të ish-Presidentit Bujar Nishani, i ndarë nga jeta pak ditë më parë.

Në të gjitha institucionet shtetërore dhe publike flamuri kombëtar është ulur në gjysmështizë.

Ceremonia e homazheve nisi nga 10:00, për të vijuar deri në orën 12:00, në mjediset e institucionit të Presidencës.

Presidenti Ilir Meta dhe drejtues të tjerë të lartë të shtetit, ashtu dhe ish-Kryeministri Sali Berisha u përkulën para arkëmortit të ish-Presidentit të ndjerë.

Edhe nga radhët e mazhorancës u bënë homazhe për ish-Presidentin e ndjerë, mes tyre kreu i grupit parlamentar socialist Taulant Balla, Mimi Kodheli, Klodiana Spahiu, Petro Koçi etj.

Homazheve iu bashkuan edhe ish-presidentët Rexhep Meidani, Alfred Moisiu, Bamir Topi, por edhe ish-presidenti i Kosovës Fatmir Sejdiu.

Ndërkohë shpenzimet e varrimit dhe të ceremonialit të përballohen nga buxheti i miratuar për Kryeministrinë për vitin 2022.

Ish-Presidenti do të përcillet më tej drejt varrezave të Sharrës, i shoqëruar me një kortezh mortor.

Bujar Nishani, u nda nga jeta të shtunën e lënë pas në moshën 56-vjeçare.

Ai gjeti vdekjen rreth një muaj pasi ishte shtruar në Gjermani.

Përkeqësimi i gjendjes shëndetësore të ish-Presidentit, erdhi pas infektimit me Covid, ku sëmundja autoimune në mëlçi nga e cila vuante, bëri që shëndeti i tij të pësojë vetëm rëndim.

Pas shtrimit në spitalin e Sanatoriumit, ai u dërgua në fund të prillit në Gjermani, ku dhe ndërroi jetë.

Bujar Nishani ishte në krye të shtetit nga 24 korriku i vitit 2012, deri në 24 korrik 2017.