Forcat e armatosura të Iranit janë vendosur në gatishmëri të lartë me urdhër të liderit suprem të vendit, Ayatollah Ali Khamenei në dritën e kërcënimeve të Presidentit amerikan Donald Trump kundër Teheranit, njoftoi agjencia e lajmeve Reuters duke cituar një zyrtar iranian.
Irani ka lëshuar njoftime për Irakun, Kuvajtin, Emiratet e Bashkuara Arabe, Katarin, Turqinë dhe Bahreinin se çdo mbështetje për një sulm të SHBA ndaj Iranit, duke përfshirë përdorimin e hapësirës ajrore ose territorit të tyre nga ushtria amerikane gjatë një sulmi, do të konsiderohej një akt armiqësie, tha zyrtari, i cili foli në kushte anonimiteti.
“Një veprim i tillë do të ketë pasoja të rënda për ta”, tha zyrtari.
Reuters raportoi se Irani refuzoi negociatat e drejtpërdrejta me SHBA-në për një marrëveshje bërthamore, por dëshiron të vazhdojë negociatat indirekte përmes Omanit, një kanal prej kohësh për mesazhe midis shteteve rivale.
“Bisedimet indirekte ofrojnë një shans për të vlerësuar seriozitetin e Uashingtonit për një zgjidhje politike me Iranin”, tha zyrtari.
Më 7 mars, Trump tha se i dërgoi një propozim Khameneit për bisedimet. Më 30 mars, lideri amerikan u zotua të vendosë detyrime shtesë ndaj Iranit brenda dy javësh nëse negociatat dështojnë.
Ai gjithashtu kërcënoi Republikën Islamike me bombardime të paprecedentë në rast të një refuzimi të plotë të marrëveshjes.
Në përgjigje, Khamenei tha se nuk beson në një ndërhyrje ushtarake të SHBA-së, por paralajmëroi se çdo përpjekje e Uashingtonit për të provokuar trazira në Iran do të zmbrapset me vendosmëri.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
