Operacionet e policisë /Rama dhe Basha përplasen në distancë për “peshqit e mëdhenj”

E diela nuk ishte një ditë e zakonshme për Policinë e Shtetit, ku pas megaoperacionit që mbetën të arrestuar 27 persona, në mbrëmje u vunë në pranga edhe dy ish-deputetë të Partisë Socialiste. Arben Çuko, ish-drejtor i Burgjeve akuzohet për marrjen e ryshfetit për transferimin e një të burgosuri, ndërsa kolegu i tij në PS, Arben Ndoka për përvetësim prone përmes falsifikimit të dokumenteve. 

Ky operacion i policisë ka përplasur në distancë liderin demokrat Lulzim Basha dhe kryeministri Edi Rama.

Rama përgëzoi policinë dhe prokurorinë për këto aksione, por lideri demokrat Basha e pa të gjithë këtë, si një shfaqje dhe propagandë të qeverisë për të hequr vëmendjen nga ata që ai i quan peshq të mëdhenj. Dhe sipas Bashës, peshk i madh nuk është as Çuko as Ndoka. Peshku i madh për kryedemokratin, ka emrin e kryetarit të Bashkisë së Durrësit, Vangjush Dakos.

“Peshku i madh i kësaj çështje quhet Vangjush Dako, të tjerët janë përpjekje për të shpëtuar Dakon, për të shkatërruar hetimet që duhet të çojnë një orë e më parë në arrestimin e Dakos. Kjo është një nga dosjet që ka marrë përsipër të shkatërrojë Donika Prela”, tha Basha duke ju referuar drejtueses së Prokurorisë për Krime të Rënda e cila këtë të hënë doli në një konferencë të përbashkët për media, me drejtorin e Policisë Ardi Veliu dhe ku foli pikërisht për arrestimin e dy ish të majtëve.

I menjëhershëm ishte edhe reagimi i kreut të qeverisë ndaj akuzave të kryeyarit të PD.

Në një status në rrejetin social Twitter, Rama thotë se këto janë akuza dhe sulme vullgare që vijnë nga dhimbjet e forta të kokës. Kryeministri thotë se lufta me krimin e me korrupsionin vetëm do të përshkallëzohet.

"Shpif shpif se lirohesh, i thonë një llafi, po s'ka më peshk se rob jo e jo, që s'e ka marrë vesh se sulmet vulgare ndaj prokurorisë vijnë nga dhimbjet e forta të kokës  për çështjet e hapura me drejtësinë! Lufta me krimin e me korrupsionin vetëm do të përshkallëzohet", shkruan Rama.