Klodian Braho është prezantuar sot zyrtarisht si drejtues i SPAK-ut, duke i marrë “stafetën” Altin Dumanit. Në fjalën e mbajtur Braho theksoi se do të angazhohet për të mbrojtur pavarësinë e SPAK-ut, ndërsa konsideroi si shtylla BKH-në dhe sektorin e Hetimit Financiar. Gazetari Arsen Rusta bën me dije se të pranishëm në ceremoni kanë qenë edhe përfaqësues të ambasadës amerikane.
Në fjalën e mbajtur Braho tha:
Marrja e detyrës është angazhim për të respektuar kushtetutën dhe ligjin, për të mbrojtur pavarësinë e SPAK-ut dhe për të forcuar më tej besimin e qytetarëve. Falë mbështetjes së pakursyer të partnerëve ndërkombëtarë SPAK-u po përforcohet si strukturë solide e ndjekjes penale. Në ushtrimin e kësaj detyre fokusi im do mbetet forcimi i funksionimit të brendshëm, respektimi rigoroz i standardeve ligjore dhe garantimi i pavarësisë së prokurorëve. BKH dhe sektori i hetimit financiar janë shtylla të rëndësishme SPAK-ut. Bashkëpunimi i ngushtë dhe i bazuar në besim reciprok mes prokurorëve dhe hetuesve do vijojë të forcohet, duke synuar hetime më cilësore dhe rezultate konkrete. Misioni i SPAK-ut shkon përtej mandateve individuale.
Ndërkohë ish-kreu i SPAK Altin Dumani e konsideroi periudhën e drejtimit të SPAK si më sfiduesin e jetës së tij, duke u shprehur se janë përballur me presione.
Në fjalën e mbajtur, Dumani tha:
“Sot mbyllet një kapitull që ka qenë ndër më sfiduesit në karrierën time 26 vjecare si prokuror. Drejtimi i SPAK-ut Ka qenë privilegj, por edhe përgjegjësi. Jemi ndeshur me presione të mëdha. Kemi punuar me profesionalizëm, integritet dhe vendosmëri. Sot SPAK është më i fortë, më i konsoliduar, dhe më i besueshëm se më parë. Dua t’u shpreh mirënjohjen partnerëve ndërkombëtarë që kanë qenë krah nesh në çdo etapë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
