Macron mendon ndalimin e rrjeteve sociale

Presidenti francez Emmanuel Macron u tha kryebashkiakëve të martën se qeveria e tij mund të konsiderojë kontrollin e aksesit në rrjetet sociale në të gjithë Francën “kur gjërat të dalin jashtë kontrollit”. Kjo pason disa ditë trazirash në vend pas vrasjes nga policia javën e kaluar të një adoleshenti me origjinë afrikano-veriore në një periferi të Parisit. “Ne duhet të mendojmë për përdorimin e këtyre rrjeteve sociale nga të rinjtë,” tha Macron para një grupi prej rreth 250 kryebashkiakësh, komunat e të cilëve ishin ndikuar nga dhuna, sipas The Guardian, duke cituar një video nga transmetuesi francez BFM TV. “Kur gjërat dalin jashtë kontrollit, mund të na duhet t’i rregullojmë ose t’i ndërpresim. Macron shtoi se ai beson se ky është një “debat i vërtetë që duhet ta kemi në dritën e ftohtë të ditës”. Javën e kaluar, Macron tha se kompanitë e mediave sociale kishin luajtur një rol të konsiderueshëm në trazirat në të gjithë vendin. Presidenti francez u bëri thirrje gjithashtu rrjeteve të ndryshme sociale që të shfaqin një “ndjenjë përgjegjësie” kur bëhet fjalë për moderimin e përmbajtjes në platformat e tyre dhe të heqin postimet që mund të nxisin dhunën. Qeveria e Macron është përballur me trazira dhe plaçkitje të gjera që nga vdekja adoleshenti gjatë ndalimit nga policia më 27 qershor, gjë që ka ndezur tensionet e racizmit dhe brutalitetit policor në të gjithë vendin. Macron ka propozuar gjithashtu vendosjen e gjobave për të rinjtë që marrin pjesë në trazira.