Protesta të dhunshme në Britani, qeveria në mbledhje urgjente: Dënojmë ngjarjet

Protestat e dhunshme në disa qytete të Britanisë pas sulmit me thikë në një sallë kërcimi një javë më parë ku tre vajza të mitura mbeten viktimë si dhe tentativa për djegien e hotelit të azilkërkuesve në Rotherham, kanë detyruar qeverinë britanike të mbajë këtë të hënë një mbledhje urgjente.

Teksa dënoi skenat e dhunës, Sekretarja e Brendshme e Britanise Yvet Cooper, njoftoi se shumë shpejt të gjithë personat e përfshirë në to do të japin llogari përpara drejtësisë.

Ne dënojmë ashpër çdo skenë të turpshme dhune të shfaqur në protestat e mbajtura këto ditë në Mbretërinë e Bashkuar. Çdo person i përfshirë në këto trazira do të japë së shpejti llogari përpara drejtësisë. Jemi siguruar për shtim të prokurorëve dhe hapësirave në burgje. Ndërkohë i kemi bërë të qartë policisë se ka mbështetjen tonë të plotë në punën e saj për ruajtjen e rendit dhe sigurisë.

Cooper gjithashtu u ndal edhe tek pakicat myslimane, që sipas saj, me të drejtë janë të shqetësuara për sigurinë e tyre, pasi shënjestër e protestave ka qenë pikërisht ky target dhe xhamitë e hotelet që strehojnë kryesisht emigrant myslimane.

Edhe kryeministri Keir Starmer në një qëndrim pas mbledhjes së qeverisë së tij deklaroj se të gjithë njerëzit në Mbretërinë e Bashkuar pavarësisht racës apo besimit kanë të drejtë të jenë të sigurtë teksa njoftoj edhe ngritjen e një strukture të posaçme policore.

U ra dakord për një sërë veprimesh përfshirë edhe krijimin e një "ushtrie të përhershme" oficerësh specialistë të policisë që do të merren me këto incidente atje ku do të jetë e nevojshme.  Ata që merren me veprimtari të dhunshme “do të ndiejnë fuqinë e plotë të ligjit”.

Trazirat në Mbretërinë e Bashkuar po ashtu janë komentuar edhe nga një sërë ligjvënësish, një pjesë e të cilëve thonë se asnjë ngjarje nuk i justifikon ndërkohë të tjerë fajësojnë qeverinë se nuk mori masat e duhura që në nisje të tyre.

Nga protestat e dhunshme të mbajtura në Mbretërinë e Bashkuar numri i të arrestuarve ka shkuar mbi 150 persona. Ndërkohë situata agravoi në këtë pikë pas informacioneve të konsideruara të rreme për origjinën e autorit të sulmit me tre viktima dhe disa të plagosur.

Sipas tyre, thuhej se autori i përkiste besimit mysliman dhe se kishte mbërritur në Britani me gomone në vitin 2023.