Shifra rekord me Covid/ Meta: Pandemia jashtë kontrollit, qeveria të mos bëjë sehir

Pas rasteve të reja shumë të larta me Covid-19 të regjistruar në vendin tonë në 24 orët e fundit, ka ardhur një reagim nga presidentit Ilir Meta.

Meta shprehet se pandemia në vendin tonë ka dalë jashtë kontrollit ndërsa shprehet se kapacitet spitalore rezultojnë të tejmbushura dhe sipas tij përvec propagandës asnjë plan ska nisur për vaksinimin e popullsisë.

“Pandemia COVID-19 në vendin tonë po del jashtë kontrollit. Në 24 orët e fundit, është regjistruar numri më i lartë i qytetarëve të infektuar, krahasuar me çdo ditë tjetër.

Një tjetër shifër tronditëse është shënuar edhe sa i përket jetëve të humbura. Kapacitetet spitalore për të pritur shtrimet e reja ditore, rezultojnë të tejmbushura. Ndërkohë veç propagandës, asnjë plan nuk ka për nisjen e vaksinimit masiv të popullsisë”, shprehet Meta.

Duke shprehur shqetësimin për këta tregues, presidenti i ka bërë thirrje Qeverisë të mos bëjë sehir dhe as mos t’i trajtojë qytetarët, si numra për statistika ditore, duke i lënë në mëshirë të fatit.

Sipas tij, “Çdo shqiptar meriton të trajtohet me dinjitet dhe të ketë të gjithë asistencën e domosdoshme këshillimore dhe shëndetësore nga ana e shtetit, për të përballuar pasojat e rrezikshme të pandemisë.

Është e patolerueshme të numërohen çdo ditë të infektuarit dhe jetët e humbura dhe të mos merret asnjë masë për të frenuar COVID-19”.

Meta deklaron më tej se nevojitet urgjentisht, një strategji e re dhe efikase, për të frenuar pandeminë, përmirësuar kushtet në spitale, mbështetur financiarisht të prekurit dhe familjet e tyre dhe rritur nivelin ndërgjegjësues të popullatës.

“Çdo vonesë është kosto e madhe për qytetarët, shëndetin dhe jetën e tyre dhe kjo është jo vetëm e pafalshme, por edhe e dënueshme. Gjithashtu, ju bëj apel qytetarëve të mos e ulin vigjilencën dhe të vijojnë të zbatojnë me rigorozitet rregullat antiCOVID”, përfundon Presidenti Meta.