Sipërfaqja e bimësisë së shkatërruar nga zjarret në Brazil u rrit me 79% në vitin 2024, duke arritur në 30.8 milionë hektarë, sipas një raporti të platformës së monitorimit MapBiomas të publikuar sot.
Kjo është zona më e madhe e djegur në vendin e Amerikës Latine në një vit që nga viti 2019.
Amazona, një rajon gjigant natyror me një ekosistem vendimtar për rregullimin e klimës, ishte më i godituri me rreth 17.9 milionë hektarë të shkatërruar, ose 58% të totalit, dhe më shumë se e gjithë zona e djegur në të gjithë vendin në vitin 2023, specifikon studimi.
2024 ishte një vit “atipik dhe alarmant”, shprehet Ane Alencar, koordinatore e MapBiomas Incendie, platforma monitoruese e Observatorit Brazilian të Klimës.
Sipas të dhënave zyrtare, më shumë se 140.000 zjarre u regjistruan në vitin 2024, numri më i lartë në 17 vjet dhe një rritje prej 42% krahasuar me vitin 2023.
Shkencëtarët besojnë se shkalla e këtyre zjarreve është e lidhur me ngrohjen globale, e cila e bën bimësinë më të thatë, duke lehtësuar përhapja e flakëve.
Por pothuajse në të gjitha rastet ato shkaktohen nga njerëzit. Alencar paralajmëron veçanërisht për zjarret që kanë goditur pyjet, zona kyçe për kapjen e karbonit përgjegjës për ngrohjen globale: 8.5 milionë hektarë u shkatërruan në 2024, krahasuar me 2.2 milionë në 2023.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
