Ngjarja më e madhe e librit hap siparin sot në Tiranë.
Panairi i Librit nis sot në Tiranë me një sërë aktivitetesh. “Libri na bashkon të gjithëve” kjo është motoja e edicionit të 26-të të Panairit të Librit, që nis sot në Pallatin e Kongreseve.
Këtë vit në panair do të jetë pjesëmarrja e 95 ekspozuesve, shtëpi botuese, institucione të arsimit të lartë dhe të tjera që punojnë me librin.
Një ditë më parë kryetari i Shoqatës së Botuesve Shqiptarë Petrit Ymeri u shpreh se panairi është aktiviteti më i madh kulturor në vend, jo vetëm libror. Sipas tij kosto e panairit kap shifrën e 200 mln lekëve të vjetra.
Panairi do të mbledh rreth vetes shumë shkrimtarë nga Shqipëria, Kosova, por edhe të huaj. Nga këta të fundit më i shquari është Lilian Thuram, futbollist i jashtëzakonshëm, por ai këtë radhë vjen në kostumin e shkrimtarit. Pastaj vlen të përmendet Ilide Carmignani, një personalitet i letërsisë, jo vetëm italian, por edhe evropian.
Në ditën e dytë të panairit, Shoqata e Botuesve organizon një seminar rreth problemeve të përkthimit të letërsisë për fëmijë dhe adoleshentë në shqip. Në këtë seminar është e ftuar edhe një përkthyese italiane, konsulente editoriale e Sallonit të Librit në Torino, përkthyese e Bolanos dhe Markezit dhe organizatore e seminareve me këtë temë, Ilide Carmignani.
Panairi do të shoqërohet me një sërë aktivitetesh promovuese, ndërsa në 19 nëntor do të ndahen edhe 4 Çmimet e përvitshme, të përzgjedhura nga juria e kryesuar nga gazetarja Arta Marku.
Si çdo vit, do të zhvillohet edhe kësaj here, konkursi i Çmimeve të Panairit për titujt e rinj nga të gjitha trevat shqiptare (për autorin, përkthyesin, librin më të mirë për fëmijë etj.)
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
