Një eksperte e OKB-së ka arritur në përfundimin se ka "prova të besueshme" që kërkojnë hetime të mëtejshme lidhur me përgjegjësinë e princit të kurorës saudite, Mohammed bin Salman, dhe zyrtarëve të tjerë të lartë në vrasjen makabre të gazetarit Jamal Khashoggi.
Agnes Callamard, raportuese speciale e OKB-së për ekzekutimet jashtëgjyqësore, tha se Khashoggi ishte "viktimë e një ekzekutimi të qëllimshëm dhe të paramenduar, një vrasje pa gjyq për të cilën shteti i Arabisë Saudite është përgjegjës sipas ligjit ndërkombëtar të të drejtave të njeriut".
"Në të vërtetë, ky hetim për të drejtat e njeriut ka treguar se ka dëshmi të mjaftueshme dhe të besueshme lidhur me përgjegjësinë e princit të kurorës, gjë që kërkon hetime të mëtejshme", tha zonja Callamard në një raport, i cili bazohet në një hetim gjashtëmujor.
Princi Mohammed ka mohuar vazhdimisht përfshirjen në vdekjen e Khashoggi-t në konsullatën saudite në Stamboll, në tetor të vitit të kaluar. Riadi e ka cilësuar vrasjen e Khashoggit një operacion të shkuar keq dhe nxjerrë para drejtësisë 11 të dyshuar sauditë.
Vrasja e Khashoggi shkaktoi krizën më të madhe diplomatike të Arabisë Saudite që nga sulmet e shtatorit 2001 në SHBA.
Riadi është përpjekur dëshpërimisht për ta hedhur pas krahëve vrasjen dhe për ta rikthyer vëmendjen në programin ambicioz të reformave të Princit Mohammed për nxitjen e ekonomisë në forma të tjera që nuk kanë të bëjnë me rezervat e naftës.
Zyrtarët turq dhe sauditë thanë se trupi i Khashoggit u copëtua pasi ai u vra. Riadi nuk i është përgjigjur ende raportit të raportueses speciale të OKB-së. / Financial Times /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
