Dizajnerja e fustanit të dasmës së Meghan Markle vlerëson stilin e saj minimalist pas jetës mbretërore

Clare Waight Keller, stilistja që krijoi fustanin e dasmës së Meghan Markle në vitin 2018, ka komentuar për evoluimin e stilit të dukeshës në një intervistë të re për The Telegraph. Sipas saj, Meghan ka zhvilluar një stil “minimalist, elegant dhe të përjetshëm”, duke shtuar: “Ajo e di çfarë i pëlqen.”

Meghan, e cila shpesh vishte nuanca të zbehura gjatë kohës si anëtare punuese e familjes mbretërore për të shmangur konkurrencën me Mbretëreshën Elizabeth apo anëtarët më të lartë, ka folur më herët për këtë zgjedhje në serinë Harry & Meghan.

Pas largimit nga detyrat mbretërore në vitin 2020, dukesha pati një periudhë të shkurtër me ngjyra të forta, por në vitet e fundit është rikthyer te stili monokromatik, sidomos që kur u vendos në Kaliforni. Në Paris Fashion Week këtë tetor, ajo mbajti një veshje të bardhë minimaliste në shfaqjen e Balenciaga-s.

Meghan ka pranuar se e përdor ndikimin e saj për të mbështetur stilistë të vegjël dhe miq të saj, duke thënë se “edhe një vath i vetëm mund të ketë ndikim”.

Waight Keller, e cila ka vizituar Meghan-in në Kaliforni, e përshkroi bashkëpunimin e tyre për fustanin e dasmës si “momentin më të bukur dhe një nder të jashtëzakonshëm”.