Gazetari sportiv Ervin Baku tha në “Mcn Informacion” se skuadrat shqiptare kanë mundësi ta kalojnë turin e parë në eleminatoret e kompeticioneve europiane. Baku tha se ajo çfarë u ka munguar ekipeve shqiptare në vite ka qenë menaxhimi i klubit nga A-ja te ZH-ja, por me kalimin e viteve janë pjekur kushtet.
“Mendoj që të 3 skuadrat Egnatia, Partizani, Vllaznia, kanë mundësi ta kalojnë këtë tur, dhe Dinamo ka mundësi të kalojë turin e dytë. Egnatia do jetë e treta e vërteta, ka ruajtur boshtin, skuadrën, trajnerin. Do luajë në stadiumin e saj që është certifikuar nga UEFA. I ka të gjitha mundësitë. Përballë ka kampionen e Islandës. Është totalisht e kalueshme, por nëse themi ‘detyrim’, i bie ta nënvlerësojmë kundërshtarin. Ne kurrë s’kemi eliminuar një ekip islandez. Egnatia vitin e kaluar pasi u eliminua me penallti, kaloi në Konferencë Ligë dhe u eliminua nga një skuadër islandeze.
E njëjta gjë me Partizanin, kundërshtari është i respektueshëm. Edhe Vllaznia do të luajë në Elbasan me skuadrën e Letonisë. Të gjitha skuadrat shqiptare kanë mundësi reale për të bërë shumë mirë këtë vit në Europë. Menaxhimi i klubit nga A te Zh, i ka munguar gjithë këto vite skuadrave shqiptare. Me kalimin e viteve janë pjekur kushtet, uroj të jetë ky viti i duhur. Te Tirana ka 12 largime, s’njohim trajnerin, drejtorin, s’ka asnjë lojtar të afruar. Ditët e ardhshme do të na tregojnë më mirë se çfarë po ndodh”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
