Ka një lidhje mes ujit të pijshëm dhe nivelit të vetëvrasjeve

Shkencëtarët britanikë kanë zbuluar një element që mund të ndikojë në uljen e vetëvrasjeve. Litiumi i pranishëm në ujin e pijshëm mund të ketë një efekt anti-vetëvrasës — sipas një studimi të ri nga Shkolla Mjekësore Brighton dhe Sussex (BSMS) dhe Instituti i Psikiatrisë, Psikologjisë dhe Neuroshkencës në King's College London.

Studimi i publikuar në “British Journal of Psychiatry” mblodhi hulumtime nga e gjithë bota dhe zbuloi se zonat gjeografike me nivele relativisht të larta ose përqendrim të litiumit në ujin e pijshëm të rrjetit publik kishin nivele më të ulëta të vetëvrasjeve.

Profesori Anjum Memon, shef i Epidemiologjisë dhe Mjekësisë së Shëndetit Publik në BSMS dhe autor kryesor i studimit, thotë: "Është premtuese që nivele më të larta të litiumit në ujin e pijshëm mund të ushtrojnë një efekt antivetëvrasës dhe të ketë potencial për të përmirësuar shëndetin mendor të komunitetit. Prevalenca e problemeve të shëndetit mendor dhe shkalla e vetëvrasjeve po rritet në shumë vende. Në të gjithë botën, mbi 800 000 njerëz vetëvriten çdo vit, dhe vetëvrasja është shkaku kryesor i vdekjes në mesin e personave të moshës 15-24 vjeç".

"Në këto kohë të paprecedenta të pandemisë COVID-19 dhe rritjes së vazhdueshme të incidencës së problemeve të shëndetit mendor, qasja në mënyra të ndryshme për të përmirësuar shëndetin mendor të komunitetit dhe për të zvogëluar incidencën e ankthit, depresionit dhe vetëvrasjeve është gjithnjë e më e rëndësishme".

Litiumi përdoret gjerësisht dhe në mënyrë efektive si ilaç për trajtimin dhe parandalimin e episodeve depresive, pasi stabilizon gjendjen shpirtërore dhe zvogëlon rrezikun e vetëvrasjeve tek njerëzit me çrregullime të humorit. Karakteristikat e tij anti-agresive mund të ndihmojnë në uljen e impulsivitetit, agresionit, sjelljes së dhunshme kriminale dhe abuzimit kronik me substanca narkotike.

Litiumi si element gjendet në natyrë në sasi të ndryshueshme në perime, kokrra, erëza dhe ujë të pijshëm. Gjurmë të tij gjenden në pothuajse të gjithë shkëmbinjtë dhe në tokë.

Përfitimet shëndetësore dhe fuqitë kuruese të litiumit natyral në ujë janë të njohura prej shekujsh. Springs Lithia, një burim i lashtë medicinal i amerikanëve vendas, me ujin e tij të pasuruar me litium, është i njohur për vetitë e tij shëndetësore. Në fakt, pija shumë popullore 7-Up përmbante litium kur u krijua në 1929.

Studimet e fundit kanë lidhur gjithashtu litiumin me incidencën e zvogëluar të sëmundjes Alzheimer dhe demencën. Kjo rrit potencialin për përdorimin e tij parandalues ​​për të luftuar rrezikun e demencës.