Dy shpërthime me bomba në stacionin e autobusëve në Jerusalem, 1 i vdekur dhe disa të plagosur

Dy shpërthime të fuqishme janë raportuar në afërsi të një stacioni autobusësh në Jerusalem.

Shpërthimi i parë ndodhi në një stacion autobusi pranë hyrjes së Jerusalemit në orën 7:06 të mëngjesit, duke plagosur të paktën 11 persona, duke përfshirë një person që vdiq më vonë, tha zëdhënësi.

Pas një shpërthimi të dytë pothuajse gjysmë ore më vonë në kryqëzimin Ramot të qytetit, në orën 7:30 të mëngjesit, tre persona u evakuuan me lëndime të lehta, shtoi policia.

Hetimet fillestare treguan se mjete shpërthyese ishin vendosur në të dy vendet e shpërthimit dhe një kërkim është duke u zhvilluar për të dyshuarit.

Pas shpërthimit të parë, dy mjekë ndihmës nga Magen David Adom, degë e Kryqit të Kuq të Izraelit, thanë se gjetën dy persona të plagosur rëndë të shtrirë në tokë kur arritën në vendngjarje.

“Ishim në stacionin MDA pranë hyrjes së qytetit kur dëgjuam një shpërthim të madh,” thanë ata. "Ne u nisëm menjëherë në vendngjarje në një numër të madh, duke përfshirë ambulanca, MICU (njësi të lëvizshme të kujdesit intensiv) dhe medikamente."

Dy të plagosur rëndë ishin shtrirë aty pranë, një 16-vjeçar në stacionin e autobusit dhe një 45-vjeçar në trotuar.

Shpërthimet pasojnë disa muaj tensionesh në Bregun Perëndimor territor palestinez i mbajtur nga Izraeli që nga viti 1967, ku ushtria izraelite ka rritur operacionet pas një serie sulmesh vdekjeprurëse anti-izraelite në mars dhe prill.