Mitsotakis korr një fitore dërrmuese, rikonfirmohet edhe për 4 vite si kryeministër

Kreu i partisë konservatore të Demokracisë së Re të Greqisë, Kyriakos Mitsotakis u zotua të përshpejtojë reformat pas fitores së tij dërrmuese të dielën në zgjedhjet e dyta në vend në pesë javë që i dhanë atij një shumicë të rehatshme parlamentare për të formuar një qeveri për një mandat të dytë katërvjeçar. Mbështetësit e ngazëllyer u mblodhën jashtë selisë së partisë në Athinë, duke brohoritur, duartrokitur, duke ndezur fishekzjarrë dhe duke valëvitur flamujt e partisë bardhë e blu. Rezultatet pothuajse të plota tregojnë se partia e tij ka fituar pak më shumë se 40.5% të votave, duke lënë pas me diferencë të thellë, partinë e majtë SYRIZA, e cila nuk shkoi më shumë 18%, 2 pikë përqindje më pak se zgjedhjet e fundit të majit. "Me rezultatin e sotëm elektoral, Greqia hap një kapitull të ri historik në kursin e saj," tha Mitsotakis në një deklaratë televizive. Votuesit, tha ai, “na dhanë një mandat të fortë për të ecur më shpejt në rrjedhën e ndryshimeve të mëdha që i duhen vendit tonë. Ata kanë mbyllur përgjithmonë një cikël traumatik të gënjeshtrave dhe toksicitetit që mbajti vendin prapa dhe ndau shoqërinë.” Mandati i tij i dytë si kryeministër “mund ta transformojë Greqinë me një ritëm dinamik zhvillimi që do të rrisë pagat dhe do të reduktojë pabarazinë, me kujdes shëndetësor publik më të mirë dhe falas, me një shtet më efektiv dhe dixhital dhe një vend të fortë”, shtoi ai. Votimi i së dielës erdhi pak më shumë se një javë pasi një anije emigrantësh u përmbys dhe u mbyt në brigjet perëndimore të Greqisë, duke lënë qindra njerëz të vdekur dhe të zhdukur dhe duke vënë në pikëpyetje veprimet e autoriteteve greke dhe politikën e rreptë të migracionit të vendit. Por fatkeqësia, një nga më të këqijat në Mesdhe në vitet e fundit, nuk ndikoi në zgjedhje, me çështjet e brendshme ekonomike në fokus të votuesve. Partia e Mitsotakis ishte parashikuar të fitonte 158 nga 300 vendet e Parlamentit, falë një ndryshimi në ligjin zgjedhor që i jep partisë fituese vende bonus. Zgjedhjet e mëparshme në maj, të zhvilluara sipas një sistemi të përfaqësimit proporcional, ia pamundësuan shumicën për vetëm 5 deputetë, edhe pse ai fitoi gati 41% të votave. Në total, tetë parti kaluan pragun e 3% për të hyrë në Parlament, duke përfshirë një parti ultra-fetare dhe parti të ekstremit të djathtë të mbështetur nga një ish-ligjvënës i burgosur nga partia Agimi i Artë e frymëzuar nga nazistët dhe tani e jashtëligjshme. 55-vjeçari Mitsotakis bëri fushatë me platformën për sigurimin e rritjes ekonomike dhe stabilitetit politik ndërsa Greqia po rimëkëmbet gradualisht nga një krizë brutale financiare gati dhjetëvjeçare. Rivali i tij kryesor, 48-vjeçari Alexis Tsipras, shërbeu si kryeministër nga viti 2015 në 2019, disa nga vitet më të trazuara të krizës financiare gati dhjetëvjeçare të Greqisë. Pas paraqitjes së tij të dobët në zgjedhjet e majit, ai kishte luftuar për të mbledhur bazën e tij të votuesve, një detyrë e ndërlikuar nga copëzimi i të majtës në Greqi. Duke folur pas votimit në një lagje perëndimore të Athinës, Tsipras dukej se pranonte se partia e tij do të ishte në opozitë për katër vitet e ardhshme. “Këto zgjedhje vendimtare nuk përcaktojnë vetëm se kush do të qeverisë vendin, por edhe jetët tona për katër vitet e ardhshme, po përcaktojnë cilësinë e demokracisë sonë”, tha Tsipras. Mitsotakis, i diplomuar në Harvard, vjen nga një prej familjeve më dominuese në politikën greke. Babai i tij i ndjerë, Konstantin Mitsotakis, shërbeu si kryeministër në vitet 1990, motra e tij shërbeu si ministre e Jashtme dhe nipi i tij është kryebashkiaku aktual i Athinës.