Charlize Theron mbush 50 vjeç: “Nuk kam moshë për t’u shtirur”

Aktorja Charlize Theron mbush 50 vjeç dhe nuk mund të ishte më e lumtur.

"I thashë mamasë se mezi prisja dhe ajo tha: 'Oh, zemër, bëhet edhe më mirë kur mbush 70 vjeç!'", i rrëfeu ajo USA Today. "Ndihem padyshim me fat dhe e bekuar me gjene të shkëlqyera. Mendoj se do të jem mirë që këtej e tutje."

Theron ka lindur në Benoni, Afrikën e Jugut, dhe është rritur në një fermë familjare jashtë qytetit. E regjistruar në kurse vallëzimi që në moshë të re, Charlize e filloi karrierën e saj si balerinë. Ajo kërkoi punë fillimisht në Evropë dhe më pas në Nju Jork, ku u regjistrua në Baletin Joffrey.

Në Hollivud, kulmin e famës e arriti në vitin 1997 me 'Avokati i Djallit', në të cilin ajo luajti gruan naive të Keanu Reeves, një praktikante avokate në firmën e djallit, i luajtur nga Al Pacino. Në vitin 1999, ajo luajti të dashurën e bukur të Paul Rudd, Candy, në 'The Cider House Rules', dhe më pas luajti një paciente me kancer në 'Sweet November', përsëri me Reeves. 

Oscari do t’i jepej në vitin 2004 me 'Monster', në të cilin ajo luante një prostitutë të shndërruar në vrasëse seriale pas viteve të abuzimit dhe dhunës. Një rol për të cilin ajo nuk hezitoi ta shndërronte rrënjësisht fytyrën e saj.

Pasuan role të tjera sfiduese, si në North Country (2005), ku ajo luan një grua në vështirësi financiare që vuan ngacmime në punë (ajo është ambasadore e OKB-së për luftën kundër dhunës ndaj grave), dhe në Bombshell (2019), rreth rastit të ngacmimit seksual që përfshin Roger Ailes, drejtorin e fuqishëm ekzekutiv të Fox News.

Gjatë promovimit për Old Guard 2, ajo u përpoq ta paraqiste veten si një grua në paqe me veten, e cila ka lënë pas çdo pasiguri - nëse ka pasur ndonjëherë të tilla.

"Mbrëmë vesha geta rrjetë sepse ndihesha mrekullisht mirë me to; nuk më intereson. Nuk kam më kohë të shtirem e ta jetoj jetën time për njerëz të tjerë", tha ajo për People. E intervistuar nga Alex Cooper në podkastin Call Her Daddy, ajo shpjegoi se sapo kishte kaluar një aventurë vetëm për një natë me një 26-vjeçar: "Ishte një përvojë fantastike." "Kam pasur tre takime rastësore në të gjithë jetën time! Duhet ta kisha bërë më shumë në të 20-at e mia", bëri shaka ajo, duke shpjeguar: "Isha e martuar - dua të them, në një lidhje serioze - që nga koha kur fillova të bëja seks deri në lidhjen time të fundit. Pastaj pata fëmijë. Cila nënë beqare ka kohë për takime? Depilim dhe grim? E kisha mendjen: Kam dy vajza për të çuar në shkollë."

Beqare prej kohësh, pasi ka frekuentuar aktorë si Sean Penn, Stuart Toënsend dhe Craig Bierko, dhe vokalistin e Third Eye Blind, Stephan Jenkins, 50-vjeçarja e re është nëna e dy vajzave: Jackson, 12 vjeç, dhe August, 9 vjeç, të cilat i adoptoi kur ishin shumë të vogla dhe i rriti larg vëmendjes mediatike. "Ato nuk kanë interes për atë që bëj unë", i tha shaka ajo Jimmy Kimmel.