Gjyq me dyer të mbyllura, Kina dënon me mbi 10 vite burg dy avokatë të njohur të të drejtave të njeriut

Dy avokatë të njohur kinezë për të drejtat e njeriut, mes tyre njëri që kishte bërë thirrje që Presidenti kinez Xi Jinping të jepte dorëheqjen, janë burgosur për më shumë se një dekadë, tha të hënën një grup mbrojtës për të drejtat e njeriut.

Xu Zhiyong dhe shoku i tij aktivist Ding Jiaxi u dënuan për “përmbysje të pushtetit shtetëror” pas gjyqeve me dyer të mbyllura.

Të dy ishin figura kryesore në Lëvizjen e Qytetarëve të Rinj, një grup i të drejtave civile që bëri thirrje për reformë kushtetuese dhe kritikoi korrupsionin e qeverisë.

Xu Zhiyong, i cili bëri thirrje për dorëheqjen e Presidentit Xi për trajtimin e pandemisë Covid-19, u burgos për 14 vjet burg pas një gjyqi me dyer të mbyllura në provincën Shandong të Kinës lindore, tha grupi i avokimit Human Rights Watch.

Ding Jiaxi u burgos me 12 vjet burg dhe u privua nga të drejtat politike për tre vjet, i tha AFP gruaja e tij Luo Shengchun, duke iu referuar një dënimi në Kinë që i ndalon të dënuarit të mbajnë poste publike.

Liritë civile dhe liria e shprehjes janë zvogëluar edhe më tej nën mandatin dhjetëvjeçar të Xi, thonë grupet e të drejtave.

Gjyqet e Xu dhe Ding ishin të mbushura me probleme procedurale dhe akuza për keqtrajtim, tha grupi i të drejtave.

Ding u arrestua në dhjetor 2019 pasi mori pjesë në një takim sekret ku përfshiheshin aktivistë dhe avokatë të të drejtave të njeriut, duke përfshirë Xu në provincën juglindore të Kinës, Fujian.

Gruaja e tij tha se ishte “jashtëzakonisht e shqetësuar” se ai mund të ishte torturuar në paraburgim.

Xu, ish-profesor i drejtësisë, u arrestua në shkurt 2020 pasi publikoi një seri postimesh në blog ndaj Presidentit Xi për qasjen e tij të ashpër ndaj krizave, duke përfshirë shpërthimin e Covid-19 dhe protestat në Hong Kong.

Ai kishte vuajtur më parë një dënim prej katër vitesh burg pasi u kërkoi zyrtarëve publikë të deklaronin pasurinë e tyre personale.