Tentativa për grabitje në një shtëpi gjatë natës në Fier i ka kushtuar jetën një personi. Ngjarja ka ndodhur rreth orës 03:00 të mëngjesit, në lagjen “29 Nëntori” Fier, pranë banesës së M.M. Disa persona kanë tentuar të hyjnë brenda shtëpisë duke thyer drynin e derës. Familjarët kanë njoftuar policinë, e cila pas mbërritjes në vendngjarje është përballur me disa persona të maskuar e të armatosur me pistoleta e automatikë, të cilët kanë qëlluar me armë zjarri në drejtim të punonjësve të policisë.
Nga shkëmbimi i zjarrit, njëri nga autorët është plagosur dhe një tjetër ka gjetur vdekjen. Autorët e tjerë, që dyshohet se janë edhe dy, duke qëlluar në drejtim të punonjësve të policisë janë larguar duke përfituar nga errësira dhe kushtet e motit, me një mjet ende të paidentifikuar.
Policia nuk ka bërë ende të ditur identitetin e viktimës dhe të plagosurit, të cilët u gjetën të maskuar dhe të armatosur me pistoleta, të cilat u sekuestruan në cilësinë e provës materiale.
Nga radhët e Policisë së Shtetit nuk ka të lënduar.
Menjëherë janë ngritur pika të shumta kontrolli në të gjitha hyrje-daljet e qytetit dhe po vijon puna për kapjen e autorëve të tjerë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
