Kremlini zotohet të hakmerret nëse BE vendos kufizime vizash ndaj rusëve

Moska po vëzhgon situatën rreth lëvizjeve të politikëbërjes së Bashkimit Europian lidhur me vizat për rusët dhe do të hakmerret ndaj çdo kufizimi.

Kështu paralajmëroi të mërkurën zëdhënësi i Kremlinit, Dmitry Peskov, raporton Tass.

Ne po e vëzhgojmë nga afër situatën, sepse ka të bëjë me qytetarët tanë. Dhe një grup tjetër lëvizjesh jomiqësore kundër qytetarëve tanë, nëse ka, do të na detyronte të kundërveprojmë.

Sipas tij, disa vende të Bashkimit Europian kanë diskutuar lidhur me kufizimin e dhënies së vizave, çka do të thotë se do të lëshohen më pak viza dhe procesi do të jetë më i gjatë duke krijuar pengesa për njerëzit.

Kjo nuk është diçka mirë dhe njerëzit e tyre do të përballen gjithashtu me vështirësi kur të mbërrijnë këtu. Prandaj, do të ketë një tjetër spirale të kësaj fushate të hapur rusofobe.

Në një takim jozyrtar në Pragë, ministrat e jashtëm të Bashkimit Europian do të shqyrtojnë ndryshimin e kodit të vizave ose krijimin e një mekanizmi vullnetar për shkurtimin e numrit të vizave të lëshuara për rusët, me përjashtim të disa kategorive të shtetasve rusë.

Ideja u mbështet nga një numër vendesh europiane, duke përfshirë Republikën Çeke dhe Poloninë, si dhe shtetet baltike. Shumica e vendeve në Europën Lindore dhe Perëndimore, përfshirë Gjermaninë, Francën dhe Portugalinë, janë kundër nismës. Shefi i politikës së jashtme në Bashkimin Europian, Josep Borrell u shpreh kundër një ndalimi në mbarë bllokun për lëshimin e vizave për të gjithë rusët.