Nëna e Presidentit amerikan, Joe Biden, Catherine Finnegan, shkakton polemika në Britaninë e Madhe. Bazuar në atë që ka rrëfyer Presidenti i SHBA, nëna e tij, e cila u nda nga jeta në vitin 2010 në moshën 92-vjeçare, nuk e ka dashur kurrë Anglinë, përkundrazi e ka urryer.
Madje njëherë refuzoi që të flinte në shtratin e mbretëreshës Elizabeth.
“Më mirë të fle në dysheme”, mësohet të ketë thënë nëna e Presidentit, bazuar në atë që thuhet në një autobiografi të shkruar nga shkrimtarja angleze Georgia Pritchett, duke ngjallur polemika.
Shkrimtarja thotë se lideri i SHBA, ia ka rrëfyer një gjë të tillë në një nga takimet që kanë pasur në Shtëpinë e Bardhë, kohë kur ishte zëvendës President.
Shkrimtarja u shpreh se, “Biden ndërroi temë lidhur me faktin se e ëma i urrente anglezët. Prindërit e tij ishin irlandezë dhe ajo kishte shkruar disa poezi për urrejtjen ndaj anglezëve”.
Catherine Finnegan, e njohur edhe si Jean, vizitoi Britaninë e Madhe dhe kaloi një natë në hotel, ku iu tha se aty kishte qëndruar edhe mbretëresha Elizabeth, raporton ‘theguardian’.
“Ishte aq e tronditur sa që fjeti në dysheme gjithë natën, në vend që të flinte në shtratin e mbretëreshës”, shkroi Pritchett, duke u ndalur në vendosmërinë e saj për t’iu qëndruar besnike bindjeve, në vend që të qëndronte në rehatinë e një krevati.
Rrënjët e forta irlandeze dhe identiteti i Biden, nuk kanë qenë asnjëherë sekret. Madje menjëherë pas zgjedhjes si President, kur iu kërkua të fliste për BBC dhe ai tha “Jam irlandez”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
