Kosova është vija e kuqe në raportin e Shqipërisë me vendet e tjera të Ballkanit Perëndimor në kuadër të mini-Shengenit. Qëndrimi i Tiranës zyrtare konfirmohet nga një deklaratë e ministrit të Jashtëm në detyrë, Gent Cakaj. Në një intevistë për “Koha TV” në Kosovë, Cakaj është shprehur se Shqipëria është e vendosur që në asnjë rrethanë të mos merren vendime për lehtësira pa përfshirjen e Kosovës.
“Ishte iniciativë për të cilën ishin të informuar të gjithë liderët e Ballkanit Perëndimor (mini-Schengeni). Parim është që në asnjë rrethanë të mos ketë marrje të masave apo detyrimeve konkrete në raport me lehtësirat që po planifikohet të ndodhin, ku përjashtohet Kosova. Shqipëria e ka të qartë vijën e kuqe, e ajo është Republika e Kosovës. Tirana zyrtare e sheh rajonin me sytë e Kosovës dhe flet me zërin e Kosovës, por jo në emër të saj sepse mund të ketë qëndrime të pavarura”, është shprehur Cakaj.
Ministri në detyrë i Punëve të Jashtme të Shqipërisë është shprehur më tej se Shqipëria do të largohet nga iniciativa e mini-Schengenit ballkanik, në rast se Serbia shfaq probleme në raport me Kosovën.
Cakaj ka komentuar takimin e parë trelateral mes kryeministrit Rama; presidentit serb, Aleksandar Vuçiç, dhe kryeministrit në largim të Maqedonisë së Veriut, Zoran Zaev, në Novi Sad të Serbisë.
“Ka qenë takim trelateral në vazhdën e takimeve të mëhershme. Shumë shpejt pritet të kemi një takim trelateral me Malin e Zi, Kroacinë e Kosovën, e kështu me radhë. Nuk do të jetë ndërmarrje trelaterale. Kryeministri Rama e ka pasur kusht thelbësor të panegociueshëm, që nëse Kosova përjashtohet nga ky bashkëpunim, Shqipëria tërhiqet menjëherë. Aty u është bërë ftesë tri shteteve të tjera: Kosovës, Malit të Zi dhe Bosnjës, që t’i bashkohen kësaj iniciative”, ka thënë Cakaj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
