Por për oborrin e Kryeministrisë nuk është shqetësuar vetëm kryebashkiaku Veliaj, por edhe Fondi Shqiptar i Zhvillimit.
Ky i fundit ka hapur tenderin me objekt “Instalacion me strukturë druri në oborrin e brendshëm të Kryeministrisë, “Parku Eden", me fond limit 4.3 miliard lekë .
Në dokumentat e tenderit thuhet:
“Sot oborri i Kryeministrisë është pa funksion dhe i pa trajtuar. Kjo hapësirë përbën një potencial të madh për ta kthyer këtë hapësirë në një arenë funksionesh dhe eventesh të reja, me një dizajn bashkëkohor dhe tërheqës”
Hartimi i projektit është detajuar nga një studio ndërkombëtare projektimi, me qendër në Austri. Kopshti i ‘Eden-it’ nuk është një kopsht në tokë, por një kopsht 3-dimensional.
Në kopshtin e Edenit stafi i Kryeministrisë mund të kaloj kohë të lirë private apo të organizoj evente publike. Shkallët e kopshtit përfshijnë elementë ulës që janë të lëvizshëm.
Sipas projektit kopshti i Edenit do të ketë edhe tribunën e tij, një rampë me ulëse, që jep mundësinë e zhvillimit të konferencave zyrtare gjatë ditës dhe në mbrëmje mundësinë për leksione, koncerte apo fjalime.
Ndërkohë bimët thuhet në dokumentat e tenderit, do të mbështjellin audiencën me një kuvertë natyrale si sfond i bukur për eventet.
Vetëm bimësia dhe peisazhi në këtë instalacion, sipas relacionit, pritet të kushtojnë 200 milionë lekë.
Pavarësisht vlerës së madhe të prokurimit, lloji i procedurës, e kufizuar, duket se do ta ngushtoj garën.
Procedura e kufizuar, e cila zakonisht zhvillohet në dy faza, bën që vetëm ata operatorë ekonomik të cilët i plotësojnë kërkesat minimale për të kryer një projekt, të ftohen për tenderim.
Autoriteti kontraktor i tenderit me vlerë 4.3 miliardë lekë, Fondi Shqiptar i Zhvillimit, u krijua me misionin për zbutjen e varfërisë në zonat rurale të Shqipërisë pas rënies së sistemit totalitar. Sot me fokus tek krijimi i infrastrukturës vendore dhe rajonale, ka zgjedhur që në vend të ndërtimit të një ujësjellësi, rruge apo shkolle, të shpenzojë 4.3 miliardë lekë për ndërtimin e kopshtit të Edenit, në Kryeministri.
Në librat e shenjtë Kopshti i Edenit, përshkruhet ndryshe kopshti ku qëndron Zoti.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
