Panairi i Librit vjen nesër me edicionin e tij të 25-të

Panairi i Librit 2022, çelet më 16 nëntor, në mjediset e Pallatit të Kongreseve.

Në këtë panair do të jenë gjithsej 97 stenda, në këtë edicion të 25-të të panairit dhe më shumë se 100 shtëpi botuese.

Një hapësirë e veçantë u është rezervuar edhe trevave shqipfolëse. Kosova vjen e përfaqësuar me tre stenda kryesore: me stendën e Institutit Albanologjik të Kosovës, me Shoqatën e Botuesve të Kosovës, si stendë më vete, dhe me “Dukagjinin”.

Maqedonia e Veriut ka një stendë më vete. “Logos” është shtëpi botuese e Shkupit, por sjell edhe botimet shqipe nga Tetova.

Mali i Zi përfaqësohet me një stendë tjetër që është ajo e Podgoricës, por vijnë edhe pak tituj të botuar në Tuz.

Në panair do të ketë edhe një shtëpi botuese italiane. Ajo është “Besa Muci”, e cila kryesisht ka në fokus botimin e letërsisë shqipe në italisht.

Përgjatë katër ditëve të panairit do të diskutohet për përkthimin, autorët e rinj, ku në fokus do të jetë edhe letërsia për fëmijë.

Ndërkohë që përmbyllja e festës së librit më 20 nëntor, do të jetë me çmimet letrare të panairit.