Presidenti i Shteteve të Bashkuara, Donald Trump, ka mbërritur në Bruksel, ku pritet të zhvillojë takime me zyrtare të lartë të Bashkimit Europian si dhe do të marrë pjesë në samitin e liderëve të vendeve antare të NATO-s.
Lideri i Shteteve të Bashkuara mbërriti në kryeqytetin belg pasditen e sotme, ndërsa u prit në aeroport nga Kryeministri i Belgjikës, Charles Michel.
Më pas, numri një i Shtëpisë së Bardhë, i shoqëruar nga bashkëshortja, si dhe familja e vajzës së tij u drejtua menjëherë drejt pallatit mbretëror, për një darkë shtetërore me Mbretin Filip dhe Mbretëreshën Matilda.
Donald Trump ka një axhendë mjaft të ngjeshur ditën e enjte, e cila nis me takimet që lideri i Uashingtonit do të zhvillojë me Presidentin e Këshillit Europian, Donald Tusk si dhe me atë të Komisionit, Zhan Klod Junker.
Ky do të jetë një ballafaqim i vështirë, pasi më herët Presidenti amerikan ka shfaqur mbështetje për daljen e Britanisë nga Bashkimi Europian.
Nisur nga deklaratat e Trump për çështjen ‘Brexit’, nuk kanë munguar në të shkuarën as përplasjet në distancë me Presidentin e Komisionit, Junkcer.
Axhenda e Trump vijon me një drekë pune me homologun francez, Emmanuel Macon.
Pas kësaj, Presidenti amerikan do të marrë pjesë në Samitin e liderëve të vendeve antare të NATO-s, ku pritet të diskutohen çështje mjaft të ndjeshme.
Theksi i ligjeratës së Trump do të vihet tek rritja e shpenzimeve ushtarake si dhe tek lufta kundër terrorizmit.
Turi i Presidentit, përtej oqeanit do të përfundojë me pjesëmarrjen në Samitin e G7 i cili do të zhvillohet në Siçili.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
