Një aksident rrugor me pasojë vdekjen e një personi ka ndodhur mëngjesin e sotëm në aksin rrugor pranë fshatit Çiflig, në hyrje të qytetit të Korçës.
Në këtë ngjarje është përfshirë një punonjës i policisë rrugore, i cili sapo kishte lënë shërbimin zyrtar. Gjatë udhëtimit me automjetin e tij privat, efektivi ka përplasur një motomjet që qarkullonte në të njëjtën rrugë.
Si pasojë e përplasjes së fortë, drejtuesi i motorit, një shtetas rreth 60 vjeç, ka ndërruar jetë në vendngjarje për shkak të plagëve të marra.
Ndërkaq, punonjësi i policisë ka mbetur i plagosur dhe është transportuar me urgjencë drejt Spitalit Rajonal të Korçës, ku aktualisht ndodhet i shtruar në repartin e reanimacionit nën kujdesin e mjekëve.
Në vendngjarje kanë mbërritur menjëherë forcat e policisë dhe grupi hetimor, të cilët po kryejnë veprimet e para procedurale për të zbardhur rrethanat dhe shkaqet e plota të këtij aksidenti tragjik.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
