Vizat dhe taksa, Haradinaj dhe Merkel takohen sërish në qershor

Kryeministri i Kosovës, Ramush Haradinaj, do të takohet me kancelaren Angela Merkel më 6 qershor.

Zhbllokimi i dialogut mes Kosovës e Serbisë, heqja ose pezullimi i taksës n100% ndaj produkteve serbe e boshnjake, si dhe çështja e liberalizimit të vizave për shtetasit e Kosovës pritet të jenë temat që do të diskutohen në takim. 

Zyrtarë nga zyra e kryeministrit Ramush Haradinaj, të kontaktuar nga gazeta “Zëri”, kanë thënë se Haradinaj në këtë takim do të kërkojë mbështetjen e Gjermanisë në procesin e liberalizimit të vizave, si dhe për dialogun mes Kosovës e Serbisë.

Haradinaj do ta vizitojë Gjermaninë me ftesë të Bundestagut. Vizita dyditore do të nisë me pjesëmarrjen në ‘Lutjet e mëngjesit’, që organizohen atje. Axhenda parashikon takime me deputetë të Bundestagut, si dhe më 6 qershor një takim pune me kancelaren Merkel.