Qyteti New York ka rënë dakord të paguajë më shumë se 13 milionë dollarë për të zgjidhur një padi për të drejtat civile të ngritur në emër të rreth 1,300 njerëzve. Bëhet fjalë për personat që u arrestuan ose u rrahën nga policia gjatë protestave kundër diskriminimit racor që përfshiu qytetin amerikan në verën e vitit 2020. Padia u fokusua në 18 nga protestat e shumta që shpërthyen në New York pas vrasjes nga policia të George Floyd në Minneapolis. Me disa përjashtime, personat e arrestuar ose të rrahur nga oficerët e policisë do të marrin 9,950 dollarë si kompensim secili. Me marrëveshjen, qyteti shmang përfshirjen në procese gjyqësore që do të ishin jashtëzakonisht të shtrenjta financiarisht dhe gjithashtu do të kishin një kosto të lartë politike. Zhvillimi vjen ndërsa disa qytete të tjera të SHBA-së po negociojnë zgjidhje të ngjashme me protestuesit, të cilët kanë protestuar për të denoncuar brutalitetin racist të policisë pas vdekjes së Floyd. Gjatë betejës ligjore, e cila filloi më shumë se dy vjet më parë, avokatët mbrojtës të qytetit argumentuan se policia po vepronte në përgjigje të një situate kaotike dhe të paprecedentë. Ata madje përmendën incidente në të cilat automjetet e policisë u dogjën dhe policët u sulmuan me gurë dhe shishe plastike. Protestuesit e arrestuar me akuza të tilla si shkelja dhe shkatërrimi i pronës, sulmi ndaj një oficeri policie, zjarrvënie ose armëmbajtje do të përjashtohen nga marrëveshja. Ata që shihen në video që pengojnë policinë të bëjë arrestime gjithashtu nuk mund të kompensohen.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
