Kryetari i Sindikatës së Shërbimeve Policore të Shqipërisë, Valentin Macaj, e sheh të nevojshëm trajnimin e punonjësve të policisë, për t’u njohur më mirë me të drejtat e njeriut, kodin e etikës dhe strategjitë e menaxhimit të situatave të protestave të dhunshme. Në një bisedë në Skype me studion e lajmeve në TvT, Macaj tha se kjo konstatohet nga protesta e djeshme për Teatrin, por edhe nga rasti i dhunimit të një 15-vjeçari pak ditë më parë nga efektivë të policisë.
“Punonjësit e policisë kanë nevojë për psikolog, për një trajtim të veçantë. Ata kanë nevojë për orë teorie për të njohur të drejtat themelore të njeriut, kodin e etikës, duhet të neutralizojnë iniciuesit e dhunës në raste protestash”, tha ai.
Lidhur me protestën e djeshme, ku pati raste të dhunës ndaj të rinjve nga ana e policsë, të cilat u evidentuan edhe në raportin e Avokatit të Popullit, Macaj tha se situata u gjenerua nga elementë politikë. Ai shtoi se duhet marrë parasysh edhe fakti se forcat e policisë kanë qenë intensivisht në krye të detyrës gjatë situatës së pandemisë.
“Punonjësit e policisë janë si qytetarët e thjeshtë. Ngjarja e djeshme mund të ketë pasur dhe tejkalime të masave kufizuese. Eksponentë luftënxitës politikë, që provokuan punonjësit e policisë. Kjo nuk do të thotë se ne justifikojmë dhunën e paprecedentë, që janë nën një trysni të jashtëzakonshme. Kanë kaluar 60 ditë që punonjësit e policisë janë të vetmit në vijën e parë. Reagimi i djeshëm nuk justifikohet. Politika që u përfshi në ditët e fundit ndoshta për kapital politika apo për të kapur një kauzë precipitoi në dhunë dhe në disa raste të pajustifikuar. Kjo është e pafalshme. Avokati i Popullit para se të bëjë deklarata politike duhet të verifikojë. Është e pafalshme të preket femra, dikush duhet të mbajë përgjegjësi, por nuk duhen futur në një thes punonjësit e policisë. Ata po përballojnë një punë prej 60 ditësh. Nën një trysni të jashtëzakonshme. Kishin mbi 12 orë pa ujë dhe ushqim, nën temperaturën e lartë. Asnjë urdhër i shkruar nuk është për të përdorur dhunë”, tha ai.
Sa i takon efektivëve të policisë pa numër serial në uniforma, Macaj tha se duhen hetime nga Shërbimi i Kontrollit të Bredshëm.
“Pa numër serie. Çfarë do të thotë kjo? Është një problem që duhet hetuar nga SHKB-ja. Numri personal është si letërnjoftimi, kjo është shkelje”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
