Parqe publike, plazhe, vende pranë shkollave, por edhe stacione autobusësh dhe ambiente sportive. Franca i shpall luftë cigareve duke filluar nga 1 korriku, në të gjitha vendet e frekuentuara nga fëmijët, me gjoba të rënda, deri në 135 euro, për ata që nuk e respektojnë ndalimin.
Një premtim i njoftuar në kuadër të Ditës Botërore Pa Duhan më 31 maj, por mbi të gjitha i kërkuar me zë të lartë për njëfarë kohe nga shoqatat kundër duhanit, të cilat kishin frikë se nuk do të ishte e mundur të miratoheshin masa të tilla.
“Ku ka fëmijë, duhani duhet të zhduket”, tha ministrja e Shëndetësisë dhe Çështjeve të Familjes, Catherine Vautrin, në një intervistë me gazetën e përditshme Ouest-France.
Ndalimi nuk do të zbatohet për tarracat e bareve ose për cigaret elektronike.
“Ndalimi i pirjes së duhanit për të miturit nën 18 vjeç nuk është vendosur ende, por nuk përjashtoj asgjë për të ardhmen”, shtoi Vautrin.
Edhe pse disa bashki franceze kanë nxjerrë dekrete për këtë qëllim, ndalimi do të jetë i vlefshëm në të gjithë vendin nga 1 korriku. Në përgjithësi, këto ndalime dhe ato që zbatoheshin më parë, si në vendet e punës, transportin publik, shkollat, zonat e lojërave të fëmijëve, hapësirat e destinuara për transport, tani “respektohen pak a shumë”, vlerësoi së fundmi Philippe Bergerot, president i Lidhjes kundër Kancerit.
Gjashtë nga dhjetë francezë ose 62% janë në favor të një ndalimi më të gjerë të pirjes së duhanit në vendet publike. Në Francë, pirja e duhanit vret 75.000 persona çdo vit, duke rezultuar në më shumë se 200 vdekje në ditë.
Kanceri i kushton shtetit francez mbi 150 miliardë euro në vit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
