Gurores së Rrajave i vihet shiriti i policisë, Vocaj në vendin e ngjarjes

Gazetari Besmir Pula në një lidhje me studion e lajmeve të MCN Tv nga gurorja e sekuestruar e fisit Rraja në Borizanë deklaroi se shiritat e policisë janë vendosur që prej pasdites së djeshme. Po ashtu gazetari tha se ditën e sotme në gurore ka qenë dhe drejtori i policisë së Tiranës, Tonin Vocaj duke shtuar se nuk ka pasur prani të përfaqësuesve të subjektit “Delia Group”. “Që prej pasdites së djeshme gurorja është mbyllur dhe janë vendosur shiritat e policisë dhe nuk lejohen as kamionët të marrin gurët. Pak orë më parë erdhën forcat e policisë për të monitoruar situatën. Në mbështetje të forcave të policisë ishte dhe drejtori i policisë së Tiranës, Tonin Vocaj. Pasi qëndroi disa minuta për të bërë inspektim u largua. Gjatë kohës që kam qëndruar nuk ka pasur asnjë përfaqësues të gurores. Nuk ka pasur kundërshtim nga pronarët. Ishte vetëm një person për të ruajtur pjesën e makinerive. Nga komunikime me banorë të fshatit ata deklarojnë se që prej orëve të parë të mëngjesit ndiheshin shpërthimet në gurore. Pavarësisht se i është premtuar vazhdimisht se do dëmshpërbleheshin për të rregulluar banesat kjo nuk ka ndodhur asnjëherë. Vetëm nga të dhënat zyrtare janë bërë inspektime në 9 banesa. Numri mund të jetë më i madh, por të paktën në 9 prej tyre që janë dhe në rreze më të afërt janë bërë inspektime, për të vërtetuar dhe pretendimet e banorëve të fshatit Borizanë. Banorët e shohin si gjënë duhur bllokimin e aktivitet të kësaj guroreje, por kjo ndërhyrje të kishte ardhur më herë që situatë mos të shkonte në këtë gjendje".