Humbi jetën pasi solli në jetë foshnjën, pezullohen dy mjekët në Gjirokastër

Dy mjekë të spitalit rajonal të Gjirokastrës, gjinekologu Dashamir Demiri dhe Kostandin Hido anestezist janë pezulluar nga detyra si mjek.

Vendimi i Gjykatës së Shkallës së Parë, Gjirokastër vjen disa muaj pas vdekjes së 20-vjeçares, Klea Muxhaj, në maternitetin e Gjirokastrës.

E reja iu nënshtrua operacionit për të lindur fëmijën e saj të parë, por pas lindjes së djalit ajo shfaqi probleme shëndetësore të cilat sipas familjarëve komplikacionet u nënvlerësuan nga mjekët dhe infermieret duke shkaktuar vdekjen.

Ngjarja ndodhi më 13 nëntor 2020 ku Klea Muxhaj nga fshati Metoq i Sarandës, e martuar në Zhulat humbi jetën pasi solli në jetë një fëmijë me operacion.

Sipas burimeve zyrtare, është bërë ekzekutimi i vendimit penal i Gjykatës së Shkallës së Parë, Gjirokastër, për caktimin e masës së sigurimit “Ndalimi i daljes jashtë shtetit”,  dhe “Pezullimin e ushtrimit të një detyre a shërbimi publik”, për dy mjekët si të dyshuar për kryerjen e veprës penale “Neglizhencë në trajtimin mjekësor”.

Nga ana e tyre të afërmit e viktimës jashtë kamerave janë shprehur se çështja është ende në prokurori dhe për të mos patur probleme avokati i ka këshilluar mos të flasin në media. 

Megjithatë ata janë të vendosur për të vazhduar rrugën e drejtësisë deri sa përgjegjësit e vdekjes së vajzës të shkojnë në burg, pasi pezullimi i mjekëve nga puna nuk është i mjaftueshëm.