Shtetet e Bashkuara të Amerikës po shqyrtojnë ndalimin ose vendosjen e kufizimeve shumë të rrepta për hyrjen e udhëtarëve nga 43 vende, raporton New York Times.
Duke cituar zyrtarë që kërkuan të mbeten anonimë, gazeta raporton se këto vende do të ndahen në tre kategori.
I pari, grupi “i kuq”, përfshin Afganistanin, Butanin, Kubën, Iranin, Libinë, Korenë e Veriut, Somalinë, Sudanin, Sirinë, Venezuelën dhe Jemenin.
Qytetarëve të këtyre vendeve do t’u ndalohet plotësisht hyrja në Shtetet e Bashkuara.
10 vende të tjera, Bjellorusia, Eritrea, Haiti, Laosi, Mianmari, Pakistani, Rusia, Sierra Leone, Sudani i Jugut dhe Turkmenistani, do të formojnë kategorinë e dytë, “portokalli”.
Biznesmenët e pasur dhe ata që udhëtojnë për biznes do të lejohen të hyjnë në SHBA, por jo ata që duan të hyjnë në vend me vizë turistike ose si emigrantë.
Qytetarët e këtyre vendeve do t’i nënshtrohen edhe një interviste personale për të marrë vizë.
22 vendet që përbëjnë kategorinë e tretë, “të verdhë”, do të kenë 60 ditë kohë për t’iu përgjigjur shqetësimeve të SHBA-së, në të kundërt do të vendosen në një nga kategoritë e tjera më kufizuese.
Zyrtarët e intervistuar nga NYT thanë se lista u përpilua nga Departamenti Amerikan i Shtetit disa javë më parë dhe ndryshimet mund të bëhen deri në kohën kur lista të arrijë në Shtëpinë e Bardhë.
Pas marrjes së detyrës, Donald Trump ngriu programin e pranimit të refugjatëve në SHBA.
Ai i kërkoi qeverisë së tij të përcaktojë shtetasit e cilit shtet nuk do të lejohen të udhëtojnë në SHBA për arsye sigurie.
Gjatë mandatit të tij të mëparshëm, Trump nënshkroi një urdhër ekzekutiv që ndalonte hyrjen në Shtetet e Bashkuara të qytetarëve të disa vendeve myslimane, përfshirë Sirinë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
