Ish-kryeministri kroat, Ivo Sanader, është dënuar me 6 vjet burg për korrupsion. Pas shqyrtimit të dosjes "Ina-MOL", gjykata konkludoi se Sanader ka marrë një ryshfet prej 10 milionë euosh për një marrëveshje shtetërore me një kompani hungareze.
Fjala është për kompaninë MOL, e cila sipas akuzës, falë Sanaderit u bë vendimmarrësi kryesor në firmën kroate të energjisë, INA.
MOL u bë aksioneri më i madh në kompaninë kroate, pasi pagoi ryshfetin 10 milionë euro.
"Ivo Sanader ka rënë dakord me Zsolt Hernádi, menaxheri i MOL, që ai do t'i dorëzojë kompanisë së tij një pjesë të kompanisë shtetërore INA për shumën prej 10 milionë euro. Duke përdorur pozicionin dhe autoritetin e kryeministrit, ai tregoi se është e nevojshme të izolohet biznesi i gazit nga INA dhe të ndryshohet marrëveshja. Ai i ka kërkuar qeverisë kroate të pranojë raportin me të cilin kompanisë MOL i jepeshin të drejta menaxhimi, të cilat qeveria miratoi", tha gjykatësi.
Nëse vendimi bëhet i formës së prerë, Sanader do të duhet t’i paguajë shtetit 10 milionë euro, në bazë të akuzës së prokurorisë.
"Në hetimin e detajuar janë përfshirë 30 dëshmitarë dhe janë lexuar dokumente të shumta, kështu që paneli penal e shpalli Sanader fajtor për marrje ryshfeti, ndërsa menaxheri i kompanisë MOL, Hernádi, akuzohet për ofertë ryshfeti", thuhet në shpjegimin e gjykatës.
Zsolt Hernádi, CEO i MOL hungarez, u dënua me dy vjet burg, por ai mbetet i paarritshëm për gjyqësorin kroat.
Vendimi mund të shkojë në apel, megjithatë ai konsiderohet një moment i rëndësishem për odisenë 10-vjeçare të kësaj çështjeje në gjyqësorin kroat.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
