Vullkani Mayon në Filipine nxjerr llavë, mijëra të evakuuar
Rreth 13.000 persona janë evakuuar në veri-lindje të Filipineve pasi vullkani më i famshëm i vendit, Mayon, nisi të nxirrte llavë.
Duke hipur në kamionë dhe karroca të tërhequra nga buaj, njerëzit që jetonin në zonën e përhershme të rrezikut ose në rreze prej gjashtë kilometrash u larguan drejt strehimoreve.
E njohur për formën konike perfekte, vullkani Mayon filloi të derdhte llavë javën e kaluar.
Por evakuimet filluan vetëm gjatë fundjavës pasi aktiviteti vullkanik u intensifikua, duke bërë që të ngrihen alarme.
Më shumë njerëz mund të evakuohen nëse aktiviteti i Mayon intensifikohet në ditët në vijim, tha Teresito Bacolcol, kryevullkanologu i vendit.
Aktualisht vullkani ndodhet nën paralajmërimin e tretë më të lartë në një sistem me pesë nivele që parashikon kërcënimin e një shpërthimi të rrezikshëm ose shpërthyes.
E vendosur në një gadishull bujqësor të quajtur Bicol, Mayon është ndër vullkanet më aktivë të vendit. Javët e fundit është bërë shqetësues me tërmete më të shpeshta dhe shkëmbinj që bien nga krateri i tij.
“Ekziston rreziku i një rryme të shpejtë të gazeve vullkanike dhe shkëmbinjve nga krateri. Do të jetë e vështirë t’i kapërcesh ato rryma,” tha Bacolcol për mediat lokale.
Një shpërthim në vitin 1814 vrau 1200 njerëz dhe varrosi një qytet të tërë.
Ndërsa Mayon shkëlqente me një ngjyrë të kuqe të zjarrtë, turistët kanë filluar të ngrenë kampingje në majat e kodrave për të parë spektaklin vullkanik.
Mayon, të cilin Guinness e përshkruan si vullkani “më konik” në botë, është një nga më të preferuarit e turistëve. Zyrtarët lokalë kanë caktuar pika shikimi ku kërkuesit e emocioneve mund të mrekullohen me kraterin e tij të ndezur.
Një mbretëreshë e bukurisë filipinase, Catriona Grey, fitoi konkursin e Miss Universe 2018 e veshur me një fustan që është frymëzuar nga llava që rrjedh poshtë shpateve të Mayon. Nëna e saj vjen nga provinca Albay, ku ndodhet vullkani.
MCN Radio
103.1 FM
MCN Radio
103.1 FM
Intro
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
