Ukraina i ka kërkuar Turqisë mbylljen e ngushticës së Bosforit për anijet ruse, si dhe kërkon vendosjen e sanksioneve ndaj Moskës.
Një kërkesë e tillë u bë nga ambasadori ukrainas në Ankara, Vassil Bodnar në një konferencë për mediat.
“Kërkojmë mbylljen e hapësirës ajrore, Bosforit dhe Dardaneleve. Kërkesën ia kemi përcjellë palës turke. Në të njëjtën kohë, duam që të vendosen sanksione ndaj palës ruse”, tha ambasadori.
Turqia, e cila është pjesë e NATO-s, ndan kufirin detar me Ukrainën dhe Rusinë në Detin e Zi.
Ajo kundërshton sanksionet kundër Moskës, por nga ana tjetër i ka quajtur veprimet e Rusisë kundër Ukrainës, si të papranueshme.
Ngushtica e Bosforit bashkë me Dardanelet bashkon detin Egje me Detin e Zi. Nëpër të dy ngushticat kalojnë rrugët e rëndësishme ndërkombëtare.
Sipas një marrëveshjeje të vitit 1936, Ankaraja kontrollon ngushticën e Bosforit dhe Dardanelet, si dhe mund të kufizojë kalimin e anijeve luftarake nëse në rast situatash kërcënuese apo lufte.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
