Kroatët protestojnë kundër planit të qeverisë për të rritur moshën e pensionit

Mijëra qytetarë kroat protestuan të shtunën në Zagreb lidhur me planet e qeverisë për të rritur moshën e pensionit me 67 vjeç dhe për të ndërprerë pensionin atyre që dalin më herët se kjo moshë.

Këtë javë qeveria i kërkoi parlamentit të kalojë legjislasionin që të kalojë reformën e pensionit që rrit moshën e daljes në pension nga viti 2033 e më tej, duke e mbrojtur atë si një hap në përpjekjet për ta bërë sistemin e pensioneve të qëndrueshëm.

Projekt-ligji gjithashtu përfshin një propozim që parashikohet që të ndërpritet pensioni për të gjithë ata persona të cilët ndaluan së punuari para moshës së daljes në pension.

"Ka shumë mjerim dhe hidhërim për ne. A nuk është një propozim i tillë për daljen në pension i papërgjegjshëm ndaj punonjësve tanë dhe pensionistëve?", tha një nga udhëheqësit e sindikatave që organizuan protestën, për turmën e mbledhur në sheshin qendror të Zagrebit.

Nën thirrjet "Hajdutë", shumë prej protestuesve mbanin në duar banderola me mbishkrime ku akuzonin qeverinë  se po varfëron  pensionistët dhe punëtorët.

"Nga shkolla në papunësi, nga puna në varrezë" shkruhej në një nga parullat.

Punonjësit e industrisë metalurgjike, infermierët dhe përfaqësues nga profesionet e tjera  shprehen se nuk mund të punojnë deri në moshën 67 vjeçare. 

Krerët e sindikatave thonë se ligji i ri do të dëmtonte veçanërisht punonjësit më të vjetër, të cilët shpesh janë nën presion të dalin në pension më herët për arsye shëndetësore ose për shkak se punëdhënësit që  duan të heqin qafe stafin e vjetër.

Ata gjithashtu kanë theksuar se kroatët kanë një jetëgjatësi më të shkurtër se njerëzit në shumë vende të tjera të Bashkimit Evropian. 

Sindikatat janë zotuar të nisin një fushatë për një referendum mbarëkombëtar që do të thirret mbi propozimin për reformën e pensioneve nëse qeveria refuzon kërkesat e tyre për të tërhequr ligjin. 

Për të bërë një referendum, mbështetësit e votimit duhet të mbledhin nënshkrimet e 10 përqind të elektoratit, pra rreth 375,000 njerëz, shkruan Reuters. 

Analistët dhe studiuesit ekonomikë thonë se Kroacia nuk mund të krijojë një sistem të qëndrueshëm reformash në plan afatgjatë pa rritur moshën e pensionit.