Spahiu: VV, partitë e opozitës dhe Osmani, të interesuar që situata politike të mos zgjidhet

Profesori i Shkencave Politike Nexhmedin Spahiu tha në edicionin e lajmeve në MCN TV se qeveria Kurti, partitë opozitare, Presidentja Osmani dhe Gjykata Kushtetuese janë të interesuar që situata politike në Kosovë të mos zgjidhet. 

“Është vështirë e pritshme që ky zhbllokim të ndodhë. Të gjitha forcave u leverdis një situatë e tillë, jo vetëm partive në Parlament, por edhe Presidencës, Gjykatës Kushtetuese, të gjithë janë të interesuar të jetë situata çfarë është, të vetmit që s’i leverdis është interesi kombëtar dhe qytetarët e Kosovës që paguajnë taksa. Partisë në pushtet i leverdis sepse qeveria është në detyrë. 

Në anën tjetër forcave opozitare s’po u leverdis të shkohet në zgjedhje, për shkak se ato po presin që partia e Albin Kurtit të zvetnohet, dhe sa më shumë të zgjatet një situatë e tillë, kanë gjasa për rezultate më të mira në zgjedhje të parakohshme. Presidentes i skadon mandati në mars të vitit që po vjen, dhe i intereson një situatë e koklavitur dhe shpreson që aleatët e Kosovës, SHBA, do ndërhyjnë dhe do imponojnë një mandat të dytë të saj si Presidente. 

Këtu kemi edhe Gjykatën Kushtetuese. Nëse nuk zgjidhet Presidenti, duke mos patur edhe kryetar parlamenti, ushtrues i detyrës bëhet kryetari i Gjykatës Kushtetuese, prandaj edhe ky institucion është i interesuar që sa më shumë të tollovitet situata në Kosovë. Interesi i AAK-së do ishte që të bënte koalicion me VV-në. Ky është edhe interes i VV-së, por kryeneçësia dhe raportet e acaruara mes Kurtit dhe Haradinajt bëjnë që kjo të mos ndodhë. Në zgjedhjet lokale VV do penalizohet më së shumti”.

I pyetur mbi alarmin për bombë në Kuvendin e Kosovës, Spahiu tha:

“Mund të jetë gjithçka. Mund të jetë një lojë thjesht për të treguar që në Kosovë po vlon situata. Është fare e lehtë të jetë bërë nga Serbia, por është fare e lehtë që edhe faktor të brendshëm ta kenë inskenuar, për të bërë një lojë politike”.