Ish-Presidentit Ilir Meta iu komunikua sot në SPAK mbyllja e hetimeve për aferën CEZ-DIA dhe dosjen e lobimit të LSI në SHBA. Ish-kreu i shtetit do të kërkojë gjykim të zakonshëm dhe jo të shkurtuar, bëri me dije avokati i tij Kujtim Cakrani.
Meta u paraqit në SPAK rreth orës 11:00, i shoqëruar nga avokati i tij Kujtim Cakrani, në një seancë që zgjati për afro 3 orë. Sipas Cakranit nuk ka fakt penal për akuzat ndaj Metës, dhe nuk ka asgjë të re për çështjen CEZ-DIA.
Në një postim në rrjetet sociale, Meta shprehet:
"Përshëndes mbylljen zyrtare të hetim-fabrikimeve të nisura që në Dhjetor 2019.
Asgjë e re nga takimi i fundit më 27 Maj me prokurorët e SPAK-ut.
Ngritëm me forcë dhe zyrtarisht kërkesën për të hetuar me përgjegjshmëri se kush ka bërë pagesa të paligjshme për llogari të LSI-së për kompanitë në SHBA dhe së dyti se kujt i dërgonin faturat për t’u aprovuar në Partinë e Lirisë, kompania GSIS.
Mos-hetimi në këto dy drejtime është vetëm pasojë e një diktati politik, pasi nga ana ligjore dhe profesionale kjo është gjëja më e thjeshtë që mund të bëhet dhe që duhet të ishte bërë prej dy vitesh".
Ndërkaq, mbyllja e hetimeve i është deklaruar edhe Monika Kryemadhit, Pirro xhixhos, Ema Çokut dhe Fatime Kryemadhit.
SPAK do t’i komunikonte akuzat ish-Presidentit më 29 korrik, por avokati i tij, Kujtim Cakrani, kërkoi shtyrje deri të hënën pasi ishte me pushime. Meta u arrestua më 21 tetor të vitit 2024, nën dyshimet për “korrupsion pasiv”, “pastrim parash” dhe “fshehje e pasurisë".
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
