Zbulohet mozaiku më i madh romak në Londër

Një zonë e madhe mozaiku romak i ruajtur mirë - pjesë të tij rreth 1800 vjet të vjetra - është zbuluar në Londër pranë një prej monumenteve më të njohura të qytetit.

Mozaiku mendohet të ketë zbukuruar dyshemetë e një dhome ngrënieje romake dhe vendi ku ai qëndron është afër Shard -- ndërtesa më e lartë e kryeqytetit, afër urës së Londrës.
Arkeologët nga Muzeu i Arkeologjisë së Londrës (MOLA) zbuluan mozaikun në fillim të këtij muaji gjatë një gërmimi përpara punimeve të ndërtimit që do të kryheshin në vend, i cili më parë shërbente si parkim makinash.

Gjetja është mozaiku më i madh romak që është zbuluar në Londër në të paktën 50 vjet, sipas një njoftimi për shtyp nga MOLA.

"Është një gjetje vërtet, vërtet e veçantë," i tha CNN të mërkurën Sophie Jackson, drejtoresha e shërbimeve zhvilluese të MOLA, duke shtuar se mozaikë të mëdhenj romakë nuk ndërtoheshin shpesh në Londër për shkak se ishte një qytet "i mbushur me njerëz".

"Është e pabesueshme që ka mbijetuar," tha Jackson.

Dhoma e ngrënies ku u gjet mozaiku mendohet të ketë qenë pjesë e një "mansioni" romak ose "hotel" që ofron strehim, stalla dhe ambiente ngrënieje," tha ekipi në njoftimin për shtyp. Dekorimet dhe përmasat luksoze tregonin se vetëm "oficerët e rangut të lartë dhe të ftuarit e tyre" mund të kishin qëndruar atje.

Vetë mozaiku përbëhet nga dy panele, me më të madhin që daton në fund të shekullit II ose fillim të shekullit të III pas Krishtit. Megjithatë, ekipi vuri re gjurmë të një mozaiku të mëparshëm poshtë, të cilin Jackson tha se një ekspert tani do të përpiqet ta gjurmojë dhe rindërtojë.

Pranë vendit ku u gjet mozaiku, ekipi gjeti gjithashtu gjurmë muresh të lyera "mirë", dysheme me mozaik të stilit terrazo, monedha, bizhuteri dhe shirita flokësh të dekoruar, duke sugjeruar se zona ishte e banuar nga banorë të pasur.

Edhe pse e ardhmja e mozaikut nuk është vendosur ende, Jackson tha se ai ka të ngjarë të shfaqet në publik. Tashmë arkeologët do të kalojnë në fazën përfundimtare të gërmimit, në një vend që nuk është ekzaminuar më parë.