Të zhdukur në Alpet e Zvicrës, gjenden të vdekur 5 alpinistë

Pesë nga gjashtë alpinistët e skive që ishin zhdukur prej dy ditësh në Alpet zvicerane janë gjetur të vdekur.

Lajmi është bërë i ditur nga policia kantonale e Valais-it, e cila po vazhdon kërkimin për personin e gjashtë i cili rezulton i zhdukur.

Pavarësisht kushteve të këqija atmosferike, një ekip shpëtimi ndodhet ende në vendngjarje ku u zbuluan trupat e pesë prej gjashtë personave të zhdukurve, thuhet në deklaratën e policisë.

Gjashtë alpinistët zviceranë të skive, të cilët janë zhdukur që nga e shtuna janë nga 21 deri në 58 vjeç, pesë prej tyre i përkasin së njëjtës familje nga Valais, ndërsa një person tjetër, një grua, vjen nga kantoni i Friburgut.

Sipas asaj që është raportuar në faqen e gazetës zvicerane Le Nouvelliste, ata janë tre vëllezër përfshirë një administrator komunal, dajën e tyre, kushëririn e tyre dhe shokun e njërit prej tre vëllezërve.

Disa prej tyre ishin alpinistë me përvojë dhe disa po stërviteshin për një garë alpinistike me famë botërore të planifikuar për në prill, Patrouille des glaciers, rruga e së cilës kalon gjithashtu përgjatë rrugës Zermatt-Arolla.

Alarmi u ngrit pasditen e së shtunës rreth orës 16:00 nga një familjar që priste grupin në Arolla, në Val d’Herens. Një telefonatë e bërë pak më vonë, në orën 17:19, nga një nga gjashtë personat e zhdukur, i lejoi ata të ndodheshin në sektorin Col de la Tete Blanche, rreth 3500 metra mbi nivelin e detit.

Gjatë natës ndërmjet të shtunës dhe të dielës, pesë shpëtimtarë zviceranë tentuan të arrinin grupin në këmbë nga Zermatt, por për shkak të kushteve të tmerrshme të motit dhe rrezikut të ortekëve ata u detyruan të dorëzoheshin.