Në Shqipëri luftojmë me gripin, por italianët po i çon në spital një “hall” tjetër

Temperaturat e ulëta dhe bora që ka përfshirë pjesën më të madhe të Europës kanë shkaktuar probleme në vende të ndryshme.

Në Shqipëri, përveç të ftohtit, shumë njerëz po luftojnë edhe me gripin, dy arsye këto për të cilat Ministria e Shëndetësisë ka shtyrë rinisjen e procesit arsimor për javën e ardhshme.

Por në Itali, problemet janë të një karakteri tjetër. Për shkak të akullit në rrugë, spitalet, sidomos ato të pjesës jugore të vendit, kanë regjistruar një bum frakturash.

Claudio Cricelli, presidenti i Shoqatës Italiane të Mjekësisë së Përgjithshme, ka apeluar që sidomos të moshuarit të mos dalin nga shtëpia.

“E themi shpesh gjatë valës së të nxehtit në verë, por i ftohti i dimrit është një rrezik më i madh. Ai shkakton më shumë viktima dhe këta të fundit janë kryesisht të moshuarit”, ka thënë ai.

Burimet spitalore në shtetin fqinj raportojnë se ka një rritje të sëmundjeve respiratore. Ndërsa gripi është vënë re se ka qenë më agresiv te moshat e vogla, fëmijë të vaksinuar, sesa te të moshuarit.