Një në tre kompani në Gjermani po konsiderojnë shkurtime të vendeve për periudhën e mbetur të vitit. Një studim i Institutit Ekonomik Gjerman ku u përfshinë më shumë se 2,000 kompani vuri në dukje se perspektiva për vitin 2025 mbetet e zymtë.
Ndonëse pronarët e bizneseve janë më pak të zhgënjyer për gjendjen e ekonomisë më të madhe të Evropës sesa në fund të vitit të kaluar, shkurtimet duken të pashmangshme.
Klima është veçanërisht kritike në sektorët e ndërtimit dhe prodhimit, ndërsa më e mirë situata duket në sektorin e shërbimeve.
Ekspertët sugjerojnë se qeveria gjermane duhet të marrë kundërmasa në koordinim me BE-në për t'u siguruar kompanive sa më shumë stabilitet të jetë e mundur.
"Lufta e tarifave po ushtron presion të madh në punën e përditshme të shumë kompanive. Ndryshimet e humorit të Donald Trump vijnë në një kohë të papërshtatshme dhe janë një provë e vërtetë për ekonominë gjermane”, thotë Michael Grömling, drejtues në institutin GEI.
Ekonomia e Gjermanisë u tkurr për të dytin vit radhazi në 2024 për shkak të kërkesës së dobët globale për produktet industriale të vendit dhe efekteve të vazhdueshme të krizës energjetike. Optimizmi në lidhje me planet e administratës së re për të rritur shpenzimet është zbehur me shpejtësi që kur SHBA filloi të vendoste tarifa për importet e makinave nga e gjithë bota, përfshirë ato gjermane. Tarifat aktualisht janë pezulluar në Bashkimin Evropian, në pritje të negociatave midis Brukselit dhe Uashingtonit
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
