BE, 7.4 miliardë euro për Egjiptin/ Mbështetje për ekonominë dhe frenim të emigracionit

Bashkimi Europian ka bërë gati një paketë financiare prej 7.4 miliardë eurosh për Egjiptin nga viti 2024 deri më 2027-ën.

Financimi synon ta ndihmojë Kajron në terma afatshkurtër dhe afatgjatë përmes mbështetjes me grante, por dhe shkëmbimin e mundshëm të borxhit, në mënyrë që të lehtësojë thithjen e investimeve.

Bashkëpunimi do të shtrihet në shumë fusha të ekonomisë moderne, duke përfshirë energjinë e rinovueshme, industrializimin e avancuar, bujqësinë, sigurinë ushqimore, lidhjen dhe dixhitalizimin, sigurinë dhe menaxhimin e ujit. Këta sektorë do të tërheqin investime evropiane deri në 5 miliardë euro, duke lehtësuar flukset e tregtisë dhe investimeve në përputhje me detyrimet e tij ndërkombëtare, veçanërisht ato kundrejt BE-së.

Pakti do të reduktojë varësinë nga gazi rus si dhe për të ndihmuar në ndalimin e emigracionit në Mesdhe.

Kjo marrëveshje ngre marrëdhëniet e BE-së me Egjiptin në stadin e partneritetit strategjik.

“Me peshën politike dhe ekonomike të Egjiptit dhe vendndodhjen e tij strategjike në një rajon shumë të trazuar, rëndësia e marrëdhënieve tona vetëm se do të rritet vetëm me kalimin e kohës”, tha Ursula von der Leyen, shefe e Komisionit Europian.

BE-ja ka shqetësim të shtuar për flukset migratore në kontinent, teksa ekspertët thonë se me Egjiptin po ndiqet modeli i ngjashëm me Turqinë. Më herët Brukseli ka nënshkruar marrëveshje të ngjashme me Libinë, Tunizinë dhe Mauritaninë.

Ndër vendet më të shqetësuara për emigracionin e paligjshëm nga Egjipti janë Greqia dhe Italia. Nuk kanë munguar edhe kritikat për këtë partneritet. “Human Rights Watch” tha se këto marrëveshje po forcojnë sundimtarët autoritarë teksa tradhtojnë mbrojtësit e të drejtave të njeriut, gazetarët, avokatët dhe aktivistët.