Katër oficerë të Policisë Gjyqësore kanë mbërritur këtë të enjte në shtëpinë e ish – Ministrit të Brendshëm, Saimir Tahiri për të nisur kontrollin.
Lëvizja e Prokurorisë vjen një ditë pas dhënies së autorizimit nga Kuvedi për hetim dhe kontroll personal e të banesës së ish – Ministrit.
Jashtë shtëpisë së tij ndodhen edhe gazetarë të shumtë, megjithatë teksa po futej për në banesë Tahiri nuk ka pranuar të prononcohet.
Organi i akuzës kërkoi autorizim për kontroll nga Gjykata për Krimet e Rënda menjëherë pas votimit në Kuvend.
* Prokuroria për Krimet e Rënda e akuzon ish – ministrin për trafik të narkotikëve, në bashkëpunim, kryer në formën e posaçme të grupit të strukturuar kriminal dhe korrupsion pasiv të funksionarëve të lartë.
Javën e shkuar organi i akuzës iu drejtua Këshillit të Mandateve dhe Imuniteteve me kërkesën për heqjen e imunitetit të Tahirit, me qëllim arrestimin e tij, kontrollin personal dhe të banesës.
Prokuroria thotë se ka prova që e implikojnë ish – Ministrin me grupin e vëllezërve Habilaj. Këta të fundit, në dosjen e përgjimeve të autoriteteve italiane e përmendin në bisedat e tyre emrin e Tahirit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
