Të ulur pranë njëri-tjetrit, të ndarë vetëm nga një tavolinë e vogël e bardhë. Presidenti rus Vladimir Putin i bëri homologut kinez Xi Jinping një mirëseardhje të veçantë, të denjë jo vetëm për një kryetar shteti, por edhe për një mik të ngushtë.
Në videot e publikuara nga mediat, dy presidentët duken të afërt aq sa mund të prekin njëri-tjetrin nëse vendosin të shtrijnë duart.
Kur Presidenti francez Emmanuel Macron fluturoi për në Moskë për një takim ballë për ballë me Putinin në shkurt 2022, menjëherë pas shpërthimit të luftës në Ukrainë, kreu i Kremlinit e vendosi mysafirin francez në një distancë të sigurt.
Në një imazh emblematik shohim dy presidentët ballë për ballë, por të ndarë nga një tavolinë shumë e gjatë ovale, më shumë se katër ose pesë metra larg njëri-tjetrit.
Putini rezervoi të njëjtin trajtim për Olaf Scholz, i cili mbërriti në kryeqytetin rus në shkurt të vitit 2022. I njëjti skenar si Macron iu rezervua kancelarit gjerman: ballë për ballë, por disa metra larg, në tryezën e zakonshme, të madhe ovale.
Shkaku zyrtar i distancimit social? Për të respektuar masat e sigurisë për të parandaluar infeksionet e padëshiruara të Sars-CoV-2. Megjithatë, përveç arsyeve shëndetësore, duket se Presidenti rus dëshiron të dërgojë edhe një sinjal shumë specifik, duke vendosur të mbajë distancën nga disa të ftuar dhe të afrohet me të tjerët.
Miku i tij Xi Jinping padyshim hyn në kategorinë e dytë. Dhe nuk mund të ishte ndryshe, duke qenë se Rusia dhe Kina kanë hyrë në një partneritet pa kufi, me synimin për ta konsoliduar atë për të krijuar një bashkëpunim të gjithanshëm.
Prandaj, në një farë kuptimi, afërsia midis Putinit dhe Xi përfaqëson marrëdhënien e vendosur dhe të ngushtë midis Moskës dhe Pekinit.
Para fillimit të takimit, Presidenti rus e përshkroi vizitën e homologut të tij kinez si një “ngjarje historike” në një artikull të botuar në “People’s Daily”, gazeta kryesore kineze.
Ai kujtoi gjithashtu takimin e tyre të parë, i cili u zhvillua në vitin 2010, duke shtuar se ai dhe Xi janë takuar rreth 40 herë dhe duke cituar një frazë të filozofit kinez Konfuci: “A nuk është gëzim të kesh miq që vijnë nga larg?”
Lideri rus më pas e lavdëroi Xi-n kur e përshëndeti brenda Kremlinit para një darke private.
Të dy kaluan rreth 4 orë e gjysmë në një darkë me shtatë pjata, e cila përfshinte një pjatë me ushqim deti të Paqësorit, supë, thëllëza dhe kërpudha të skuqura dhe mish dreri të pjekur në salcë qershie.
E sigurt është se, ndërkohë që Putini ka shfaqur një mosbesim të konsiderueshëm me liderët perëndimorë, i mishëruar në radhë të parë nga distancat fizike të rezervuara për mysafirët, me Xi nuk ka pasur asnjë prej këtyre, si për të nënvizuar afërsinë gjeopolitike me partnerin kinez dhe humnerën që tani ndan Perëndimin nga Rusia.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
