Rritja e çmimeve në bujqësi/ Vuksani: Duhen masa emergjente për uljen e çmimit të naftës për fermerët (VIDEO)

Rritja e ndjeshme e çmimeve në tregun vendas po rëndon jo vetëm konsumatorët, por edhe vetë bazën e prodhimit bujqësor, fermerët. 

Eksperti i bujqësisë, Gjok Vuksani, në një lidhje me studion e lajmeve në MCN TV, ka ngritur alarmin për situatën, duke kërkuar ndërhyrje të menjëhershme nga institucionet.

Sipas tij, rritja e çmimit të naftës ka goditur drejtpërdrejt kostot e prodhimit në bujqësi, duke e bërë gjithnjë e më të vështirë punimin e tokës.

Situata është shumë e vështirë si për konsumatorët, ashtu edhe për fermerët. Baza e gjithë kësaj krize qëndron te rritja e çmimit të naftës. Toka nuk mund të punohet me 220 lekë për litër naftë.

Ai theksoi se përveç karburantit, janë rritur ndjeshëm edhe inputet e tjera bujqësore si plehrat kimike, pesticidet dhe farat, duke çuar në një rritje të përgjithshme të kostove me 30-40%.

Këto kosto, sipas tij, transferohen më pas te konsumatori, duke e bërë çmimin final të produkteve ushqimore gjithnjë e më të papërballueshëm.

E gjithë kjo rritje kostoje përfundon te qytetari. Sot produktet bujqësore po bëhen gati të papërballueshme për shumë familje.

Eksperti ngriti shqetësimin edhe për mungesën e masave konkrete nga ana e institucioneve për të lehtësuar këtë situatë.

Në analizën e tij, Vuksani evidentoi dy problematika kryesore: rritjen e kostos së prodhimit vendas dhe ndikimin e importeve në treg.

Nga njëra anë kemi prodhimin vendas që po shtrenjtohet për shkak të kostove, dhe nga ana tjetër produktet e importit që në disa raste mund të abuzojnë me çmimet.

Si zgjidhje, ai propozon rikthimin ose forcimin e skemave mbështetëse për fermerët, veçanërisht për naftën, e cila sipas tij ka qenë ndër më të rëndësishmet ndër vite.

• Duhet një masë emergjente për të reduktuar çmimin e naftës. Skema e mbështetjes për naftën ka qenë ndër më të mëdhatë, me deri në 25 mijë përfitues, duke përbërë një pjesë të konsiderueshme të mbështetjes për fermerët. 

 

• Skema duhet të bazohen në studime të mirëfillta për të vlerësuar efektin real në zhvillimin e bujqësisë dhe për të garantuar përdorimin efikas të fondeve publike.