Izraeli ka njoftuar mbylljen e ambasadës së tij në Irlandë, duke përmendur politikat e supozuara "ekstreme" ndaj shtetit hebre, duke përfshirë akuzat për kryerjen e gjenocidit ndaj palestinezëve.
Vendimi për mbylljen e misionit “u mor në vazhdën e politikave ekstreme anti-izraelite të qeverisë irlandeze”, tha të dielën Ministria e Jashtme izraelite.
“Veprimet dhe retorika antisemitike e përdorur nga Irlanda kundër Izraelit janë të rrënjosura në delegjitimimin dhe demonizimin e shtetit hebre, së bashku me standardet e dyfishta”, tha ministri i Jashtëm Gideon Saar. "Irlanda ka kaluar çdo vijë të kuqe në marrëdhëniet e saj me Izraelin", shtoi ai.
“Izraeli do të investojë burimet e tij në avancimin e marrëdhënieve dypalëshe me vendet në mbarë botën sipas prioriteteve që marrin parasysh edhe qëndrimet dhe veprimet e këtyre shteteve ndaj Izraelit”, shtoi Saar.
Kryeministri irlandez Simon Harris tha se ishte "thellësisht i zhgënjyer" nga vendimi i Izraelit. “Mbajtja e kanaleve të hapura nuk ka qenë kurrë më e rëndësishme në mënyrë që të kuptojmë më mirë pozicionet e njëri-tjetrit, edhe kur nuk pajtohemi.”
Harris mohoi se Irlanda është kundër Izraelit. "Irlanda është pro paqes, pro të drejtave të njeriut dhe ligjit ndërkombëtar," tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
