Kryeministri Edi Rama së bashku me presidentin e Serbisë, Aleksander Vuçiç dhe kryeministrin e Maqedonisë së Veriut, Zoran Zaev, kanë marrë pjesë në konferencën e përbashkët virtuale për mini-Shengenin ballkanik.
Sipas një deklarate për media nga kabineti i Vuçiç, bëhet e ditur se ata diskutuan hapat e mëtejshëm në bashkëpunimin rajonal, si një proces jetësor për përparimin e Ballkanit Perëndimor dhe rrugën Evropiane në tërësi, njofton televizioni serb N1.
Ata shtuan se ranë dakord që vendet e Ballkanit Perëndimor kanë nevojë për anëtarësim në BE, por që BE gjithashtu ka nevojë për Ballkanin Perëndimor, meqë rajoni është i rrethuar nga kufijtë e BE dhe vendet që aspirojnë anëtarësimin ndajnë vlerat e përbashkëta Evropiane.
Mediat serbe raportojnë se mes tjerash është folur për heqjen e barrierave dhe lëvizjen e lirë.
“Ne i bëjmë thirrje dhe inkurajojmë kolegët tanë nga rajoni të nënshkruajnë dhe zbatojnë marrëveshje të ngjashme, në mënyrë që vizioni i një hapësire të përbashkët politike dhe ekonomike në të gjithë Ballkanin Perëndimor së shpejti, përmes tregut të vetëm, të bëhet një pjesë e rëndësishme e përditshme e qytetarëve tanë”, thanë bashkëbiseduesit“.
Bëhet e ditur, më tej se tre liderët ballkanik do të takohen më 29 korrik në Shkup për të nënshkruar marrëveshje shtesë lidhur me lehtësirat mes shteteve për tregti, përkatësisht implementimin e marrëveshjeve ekzistuese.
“Vuçiç, Rama dhe Zaev ranë dakord të takohen në Shkup në 29 korrik për të shqyrtuar përparimin në zbatimin e iniciativave dhe projekteve ekzistuese dhe për të nënshkruar marrëveshje shtesë midis tre vendeve për zbatimin e angazhimeve në kuadër të Procesit të Berlinit, si dhe bashkëpunimin dhe ndihmën në rast fatkeqësish natyrore dhe lehtësira për tregti, eksporte dhe importe”, shkruan televizioni N1.
Ata theksuan se pavarësisht vonesave në procesin e zgjerimit, ata do të vazhdojnë të përpiqen të identifikojnë mënyra të reja, fusha të politikave dhe instrumente financiarë, në mënyrë që të tre vendet të rrisin kontributin e tyre në Evropë, të forcojnë lidhjet me Bashkimin Evropian dhe të integrojnë gradualisht rajonin në tregun e vetëm evropian.
Duke folur për Agjendën e Gjelbër, bashkëbiseduesit bënë një thirrje të përbashkët për Bashkimin Evropian dhe Shtetet e Bashkuara për t’u bashkuar me vendet në të gjithë rajonin për të mbështetur zhvillimin e projekteve që mund të investohen sa më shpejt të jetë e mundur, për të përmirësuar mbrojtjen e mjedisit dhe për të rritur përdorimin e gjerë të burimeve të rinovueshme. , si pjesë e zbatimit të Planit Ekonomik dhe të Investimeve të BE-së dhe Agjendës së Gjelbër për Ballkanin Perëndimor.
“Vendet tona kanë një potencial të madh për rritje të qëndrueshme dhe zhvillim të këtij sektori. Ne do të kërkojmë mbështetje praktike për të zbuluar se cilat projekte mund të përmirësojnë rajonin tonë në drejtim të burimeve të ripërtëritshme të energjisë për qytetarët tanë dhe për të ardhmen e energjisë së gjelbër të BE” u tha në fund të konferencës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
