Reduktimi i eksporteve të ushqimit/ OKB: 19 milionë njerëz të tjerë në rrezik urie

Deri në 19 milionë njerëz të tjerë rrezikojnë të shtyhen në uri kronike për shkak të reduktimit të eksporteve të ushqimit.

Agjencia e ushqimit të OKB-së, deklaron se midis 11 dhe 19 milionë njerëz të tjerë mund të zhyten në uri kronike gjatë vitit të ardhshëm, si rezultat i reduktimit të eksporteve të grurit dhe mallrave të tjera ushqimore nga Ukraina dhe Rusia.

Boubaker Ben Belhassen, drejtor i divizionit të tregjeve dhe tregtisë së Organizatës së Ushqimit dhe Bujqësisë (FAO), saktësoi edhe vendet më të rrezikuara.

Vendet që po preken më shumë janë në rajonin e Lindjes së Afërt, Afrikës së Veriut duke pasur parasysh varësinë e tyre të madhe në importe, veçanërisht ndaj grurit, por edhe të vajit vegjetal dhe vajit të lulediellit.

Në rrezik janë edhe disa vende në Afrikën Sub-Sahariane dhe në Azi, të tilla si Bangladeshi dhe Indonezia.