Osmani: Kosova do jetë anëtarja e 47-të e KiE, thjesht çështje kohe

Anëtarësimi i Kosovës në Këshillin e Evropës është thjesht çështje kohe, sipas Presidentes Vjosa Osmani.

Kryetarja e shtetit të Kosovës përmes një postimi në platformën “X” thotë se rrugën për anëtarësim në KiE nuk do të cenojnë vlerat që përbëjnë Kosovën.

“Republika e Kosovës do të jetë anëtarja e 47-të e Këshillit të Evropës. Është thjesht çështje kohe. Në këtë rrugë, ne nuk do të cenojmë vlerat që përbëjnë themelin e vendit tonë. Pasi të arrijmë aty, ne do të vazhdojmë të qëndrojmë për shtyllat që përcakton Këshilli i Evropës: të drejtat e njeriut, demokracia dhe shteti i së drejtës. Ne nuk do të shërbejmë si dorë e zgjatur e Rusisë apo si model i sjelljes autokratike”, ka shkruar Osmani në “X” të premten.